Ellefu ára drengur lést á Elbrus-fjalli í Rússlandi þegar hann var í fjallgöngu ásamt fertugum föður sínum. Rannsóknarnefnd Kabardínó-Balkaríu hefur hafið frumrannsókn á slysinu.
Slysið varð að morgni 19. júlí í austurhlíðum Elbrus-fjalls. Faðirinn, sem rússneskir Telegram-miðlar segja heita Roman, og sonur hans féllu fram af kletti í um 4.200 metra hæð yfir sjávarmáli. Drengurinn lést samstundis en faðir hans hlaut meðal annars rifbeinsbrot og hnémeiðsli.
Leitarsveitir fundu feðgana seint á sunnudagskvöld en vegna myrkurs og slæms veðurs var ekki unnt að flytja föðurinn með þyrlu fyrr en á mánudagsmorgun.
Samkvæmt Telegram-rásinni Mash mættu feðgarnir öðrum fjallgöngumanni á leiðinni upp fjallið. Sá var á niðurleið með 14 ára syni sínum og varaði þá við því að halda áfram vegna hættulegra aðstæðna. Þeir ákváðu engu að síður að halda göngunni áfram.
Faðirinn sagði síðar björgunarmönnum að sonur hans hefði snúið sig á ökkla og gripið í öryggisvír, en festingin hefði gefið sig með þeim afleiðingum að þeir féllu fram af klettinum, samkvæmt upplýsingum frá Telegram-rásinni Baza.
Feðgarnir höfðu ekki skráð gönguleið sína hjá yfirvöldum. Neyðarmálaráðuneyti Rússlands sagði við sjónvarpsstöðina Ren TV að slík fjallganga með 11 ára barn hefði ekki fengið samþykki. Þar sem þeir voru hins vegar ekki hluti af skráðum ferðahópi bar þeim ekki lagaleg skylda til að sækja um leyfi.
Þetta var ekki fyrsta tilraun feðganna til að klífa Elbrus. Í september 2025 reyndu þeir að komast á vesturtind fjallsins, sem er 5.642 metrar á hæð, en sneru við í um 5.560 metra hæð vegna slæms veðurs.
