Elon Musk virðist hafa séð eftir því að fullyrða að Donald Trump forseti Bandaríkjanna, væri nefndur í Epstein-skjölunum, því hann hefur nú eytt færslunni af samfélagsmiðlum en hún vakti gífurlega athygli.

Musk setti fram þessar ásakanir á fimmtudag þegar hann átti í orðaskiptum við aðra notendur á netinu. Þar hélt hann því fram að ástæða þess að Epstein-skjölin hefðu ekki verið opinberuð að fullu væri sú að nafn Donalds Trump væri að finna þar. En á laugardagsmorgun virðist sú færsla hafa horfið af X.

Pam Bondi, verjandi Trump og fyrrverandi dómsmálaráðherra Flórída, birti fjölda skjala í febrúar sem tengjast máli Jeffrey Epstein, sem framdi fjölmörg kynferðisbrot og lést í fangelsi. Engin glæpsamleg tenging við Trump fannst þó í þeim skjölum. Fjölmörg leyniskjöl bíða þó enn birtingar.

TMZ náði einnig tali af David Schoen, einum af lögmönnum Epsteins, í gær. Hann sagði að Epstein hefði beinlínis fullyrt við hann að Trump hefði „ekki gert neitt rangt“ og að hann hefði engar skaðlegar upplýsingar um Trump í fórum sínum.

Tónninn milli Trumps og fyrrverandi „DOGE-leiðtoga“ hans hefur róast eftir heitar deilur á netinu, þar sem Trump hótaði að slíta ríkisstyrktum samningum við Musk, og Musk svaraði með að hóta að leggja Dragon-geimfar SpaceX niður en geimfarið er mikilvægt fyrir rekstur Alþjóðlegu geimstöðvarinnar.

Þá hélt Musk því fram að að Trump hefði ekki unnið forsetakosningarnar 2024 nema fyrir stuðning sinn.

Í gær virtist Trump búinn að fá nóg af málinu en hann sagði við fréttamenn í Air Force One-forsetaflugvélinni að hann væri „ekki að hugsa um“ fyrrverandi bandamann sinn og gaf þannig í skyn að hann hygðist ekki hittast við hann í bráð.

Hann bætti þó við að hann óskaði Elon og Tesla „alls hins besta“.

En Elon er ekki alveg laus allra mála því Trump sagði einnig að hann ætlaði að skoða samninga Musks við ríkið nánar og bætti við: „Hann hefur mikið fé. Hann fær mikið í styrki, svo við ætlum að skoða það.“