Fyrrverandi aðstoðarutanríkisráðherra Egyptalands, Hussein Haridy, segir að Ísrael kunni að hafna nýjustu vopnahléstillögu Hamas, jafnvel þótt hún sé „nánast samhljóða“ þeirri tillögu sem Ísrael sjálft hafi samþykkt fyrir nokkrum vikum.

„Það er minn skilningur að bæði bandaríska stjórnkerfið og ísraelska ríkisstjórnin hafi ekki mikinn áhuga á hlutaskiptasamningum [að Ísraelar sleppi gíslum sínum úr fangelsum í skiptum fyrir gísla Hamas]. Þau vildu að öllum gíslum yrði sleppt, og síðan myndu þau sjá hvernig málin þróuðust,“ sagði Haridy í samtali frá Kaíró.

Hann benti á að tímasetningin skipti miklu máli: „Mikið vatn hefur runnið til sjávar, einn og hálfur mánuður breytir miklu. Spurningin er ... af hverju samþykkti Hamas ekki þessa tillögu fyrir einum og hálfum mánuði? Tímasetningin skiptir sköpum.“

Haridy minnti einnig á að frá því að tillagan var fyrst lögð fram af bandaríska sendiherranum Steve Witkoff, hafi Ísrael tilkynnt áform um stórsókn gegn Gaza-borg. Þá hafi afstaða Ísraels og Bandaríkjanna að miklu leyti samræmst um að nauðsynlegt væri að sigra Hamas.

„Leikurinn hefur breyst að einhverju leyti,“ sagði Haridy, og bætti við að Ísrael vilji nú kannski ekki lengur samþykkja samninginn sem áður var til umræðu.

Ögurstund

Fyrr í dag greindi Majed al-Ansari, talsmaður utanríkisráðuneytis Katar, frá því á blaðamannafundi í Doha að áframhaldandi viðræður um vopnahlé á Gaza væru viðkvæmar og hann vildi ekki fara út í smáatriði um hvað aðgreinir nýjustu tillöguna frá þeirri sem bandaríski sendiherrann Steve Witkoff hafði áður lagt fram.

„Það sem skiptir mestu máli núna er að ná samkomulagi sem báðir aðilar geti sætt sig við, bæði í orði og efni. Það hefur verið okkar markmið undanfarna daga,“ sagði al-Ansari.

Hann lagði áherslu á að ástandið væri á afgerandi mannúðarstundu:

„Ef þessi tillaga fellur, mun ástandið versna til muna og því vinna Katar, í samvinnu við Egyptaland og aðra alþjóðlega aðila, þar á meðal Bandaríkin, að því að tryggja að vopnahlé náist.“