Ísraelski herinn hefur aukið loftárásir sínar á Gaza-borg og sprengt þéttbýl hverfi, samhliða fyrstu stigum aðgerðar sem miðar að því að ná tökum á helsta þéttbýliskjarna svæðisins. Aðgerðin gæti þvingað nærri einni milljón Palestínumanna frá heimilum sínum.
Samkvæmt heimildum á al-Ahli sjúkrahúsinu voru sex manns, þar af fjögur börn, felld í árás í Sabra-hverfinu í suðurhluta borgarinnar í dag. Myndband frá Sheikh Radwan-svæðinu sýndi lík látinna og alvarlega særða liggja í götunni umkringd rústum og eldi.
Heimildarmenn sjúkrahúsa á Gaza sögðu að að minnsta kosti 40 Palestínumenn hefðu verið drepnir víðsvegar um svæðið frá sólarupprás. Þar á meðal voru átta sem voru að leita sér mataraðstoðar.
Á meðal annarra fórnarlamba voru fimm Palestínumenn drepnir í drónaárás Ísraelshers norðvestur af Khan Younis, og þrír til viðbótar sem féllu nærri hjálparmiðstöð norðan Rafah. Í Jabalia al-Balad í norðurhluta svæðisins féllu fjórir í skothríð og tíu særðust, og í miðhluta Gaza létust fimm, þar á meðal tvö börn, við að bíða eftir aðstoð á svonefndum Netzarim-ási.
Á meðan stóð yfir skothríð og loftárásir í Sabra- og Tuffah-hverfunum og héldu þúsundir Palestínumanna áfram að flýja heimili sín í Gaza-borg.
„Við stöndum frammi fyrir bitrum aðstæðum – annaðhvort að deyja heima eða fara burt og deyja annars staðar. Meðan þetta stríð heldur áfram er lífið ótryggt,“ sagði Rabah Abu Elias, 67 ára sjö barna faðir, við Reuters.
Fréttaritari Al Jazeera, Hani Mahmoud, sagði að Ísraelsher beitti endurteknum aðferðum á Gaza: að gera loftárásir á þéttbýl hverfi til að neyða fólk á brott.
Enginn öruggur staður
Tareq Abu Azzoum, fréttaritari Al Jazeera í Deir el-Balah, sagði að Palestínumenn sem flýðu Gaza-borg hefðu engin örugg skjól. Svæði sem Ísrael hefði lýst sem „öruggum“ hefðu ítrekað orðið fyrir árásum.
„Þeir upplifa það að vera veiddir án nokkurs öruggs staðar til að fara til,“ sagði hann.
Hann varð vitni að árás á tjaldsvæði flóttafólks nálægt al-Aqsa sjúkrahúsinu í Deir el-Balah í dag. Myndskeið sýndu reykjarmekki og ringulreið eftir árásina.
Ísraelsher tilkynnti áform um að kalla til 60 þúsund varaliða til að halda áfram aðgerðum sínum í Gaza-borg, þrátt fyrir alþjóðlega fordæmingu, innlenda gagnrýni og viðvaranir um að mannúðarkrísa muni aukast. Talið er að nær ein milljón Palestínumanna sé í borginni.
„Aukin átök íá Gaza þýða meiri dauða, meira flóttaástand, meiri eyðileggingu og meiri ótta,“ sagði Christian Cardon, talsmaður Alþjóða Rauða krossins. „Gaza er lokað svæði, enginn kemst út … aðgangur að heilbrigðisþjónustu, mat og vatni minnkar stöðugt. Þetta er óásættanlegt.“
Philippe Lazzarini, yfirmaður UNRWA, sagði að vannæring barna á Gaza hefði sexfaldast frá mars. „Margir munu einfaldlega ekki hafa styrk til að þola nýtt brottflutningsáfall,“ sagði hann.
Samkvæmt heilbrigðisyfirvöldum á Gaza létust tveir úr vannæringu síðasta sólarhringinn, sem hækkaði heildarfjölda slíkra dauðsfalla í 271, þar af 112 börn. Að minnsta kosti 70 manns höfðu verið drepnir og 356 særst í loftárásum og skothríð á sama tímabili.
„Byrjun á þjóðernishreinsun“
Benjamin Netanyahu forsætisráðherra Ísraels heldur áfram aðgerðum í Gaza-borg þrátt fyrir nýjar tilraunir til að semja um vopnahlé. Gideon Levy, dálkahöfundur í Haaretz, sagði að ákvörðunin sýndi að Ísrael hefði „enga áform um að binda enda á stríðið“.
„Þetta er upphaf að þjóðernishreinsun á Gaza,“ bætti hann við.
Fréttaritari Al Jazeera, Rory Challands, sagði að Netanyahu hefði krafist aðgerðarinnar þrátt fyrir andstöðu hersins. „Hershöfðingjarnir vildu þetta ekki, þeir óttuðust gildru og töldu herinn ekki tilbúinn eftir nær tveggja ára stríð. En Netanyahu vildi það.“
Hann sagði að hætta væri á að herinn myndi ekki ráða við verkefnið. „Hann hefur einfaldlega ekki burði til þess.“
Hann bætti við að almenningsálitið í Ísrael væri farið að snúast gegn stríðinu. „Meirihluti Ísraela vill nú að stríðinu ljúki.“
