Sunnunes ehf., eignarhaldsfélag í eigu Höllu Tómasdóttur, forseta Íslands, og Jóns Björnssonar, forstjóra Veritas, skilaði 35 milljóna króna hagnaði á árinu 2025, en þau eiga hvort um sig helmingshlut í félaginu.

Viðskiptablaðið greinir frá þessu.

Hagnaður félagsins dróst verulega saman milli ára en hann nam 435 milljónum króna árið 2024, meðal annars vegna sölu á óbeinum eignarhlut í fyrirtækjum á auglýsingamarkaði.

Eignir Sunnuness námu 636 milljónum króna í árslok og er félagið nær skuldlaust. Verðbréfaeign nam 367 milljónum og eignarhlutir í hlutdeildarfélögum 225 milljónum.

Rekstrartekjur námu 40 milljónum króna en hlutdeildar-, arðs- og vaxtatekjur 59,7 milljónum.

Félagið hyggst greiða hluthöfum 30 milljónir króna í arð. Heildararðgreiðslur Sunnuness á árunum 2024 til 2026 nema þar með 150 milljónum króna.