Það er til marks um aukið vægi verðtryggðra lána á húsnæðislánamarkaði að útistandandi verðtryggð lán heimilanna hafi aukist um 21,5% að nafnvirði milli aprílmánaða 2024 og 2025 á meðan óverðtryggð lán hafa dregist saman um 13,7% að nafnvirði.

Kemur fram í mánaðarskýrslu HMS að hægt hafi á uppgreiðslum óverðtryggðra lána; samhliða lægra nafnvaxtastigi og þar að auki hafi nú þegar allnokkur fjöldi heimila endurfjármagnað óverðtryggð fastvaxtalán sín:

„Þær uppgreiðslur hófust haustið 2023 þegar fyrstu óverðtryggðu fastvaxtalánin sem tekin höfðu verið í lágvaxtaumhverfinu árið 2020 komu til vaxtaendurskoðunar“ en á þeim tíma voru í heildina séð um það bil 706 milljarðar króna sem nemur um 28% af heildarútlánum heimila á föstum óverðtryggðum vöxtum,“ eins og segir í skýrslu HMS.

Kemur fram að í heildina hafi um 45 milljarðar losnað á haustmánuðum í hittifyrra, 256 milljarðar króna af slíkum lánum árið 2024 og á fyrri hluta þessa árs hafi um 183 milljarðar króna af óverðtryggðum lánum á föstum vöxtum komið til vaxtaendurskoðunar.

Sé mið tekið af haustinu 2023 eiga því innan við þriðjungur heildarútlána á föstum óverðtryggðum vöxtum eftir að koma til vaxtaendurskoðuna og því sé útlit fyrir minni breytingar í samsetningu lána heimilanna næstu mánuði, samanborið við síðustu mánuði og misseri; 94 milljarðar af slíkum lánum koma til endurskoðunar á seinni hluta þessa árs og um 106 milljarðar á næsta ári.