Karl Héðinn Kristjánsson, sem situr og er ritari í framkvæmdastjórn Sósíalistaflokks Íslands, hefur ákveðið að láta af embætti forseta Roða, ungliðahreyfingar flokksins. Ákvörðun hans kemur í kjölfar umræðu sem skapast hefur um samband sem hann átti við 16 ára stúlku þegar hann var 22 ára gamall.
Í færslu á samfélagsmiðlum greinir Karl Héðinn frá því að ákvörðunin hafi verið tekin eftir ígrundun, með hagsmuni hreyfingarinnar að leiðarljósi.
„Ég er ótrúlega stoltur af því sem við höfum byggt saman undanfarin ár, og þakklátur fyrir samstarfið, baráttuna og traustið sem mér hefur verið sýnt.“
Karl segir umræðuna hafa kviknað vegna fyrra sambands sem hann átti utan starfsvettvangs Roða og áður en hann tók að sér forystuhlutverk innan hreyfingarinnar.
„Á síðustu vikum hefur komið upp umræða vegna sambands sem ég átti, þegar ég var 22 ára gamall, við töluvert yngri manneskju. Þetta samband átti sér stað utan vettvangs ROÐA og löngu áður en ég tók að mér forystuhlutverk í félaginu.“
Hann segir enginn innan hreyfingarinnar hafa lýst neikvæðri reynslu af honum, en viðurkennir að sambandið og þögnin í kringum það hafi vakið gagnrýni og valdið óöryggi, sérstaklega innan hóps sem leggur áherslu á traust og jafnrétti.
„Enginn innan hreyfingarinnar hefur lýst neikvæðri reynslu af mér, en ég geri mér grein fyrir því að sambandið og þögn mín um það hefur vakið gagnrýni og óöryggi, sérstaklega í hreyfingu sem leggur áherslu á jafnrétti, öryggi og traust.“
Karl lýsir því jafnframt að hann harma vanlíðan sem þetta mál hafi valdið öðrum og vonar að yfirlýsing hans varpi ljósi á afstöðu hans og fyrirætlanir.
„Framtíð mín liggur áfram í félagslegri baráttu, en ég mun nú beina athygli minni að öðrum sviðum, leggja mitt af mörkum með nýjum hætti og einbeita mér að því sem ég get best. Bæði innan flokksins og í öðrum félagslegum og skapandi verkefnum,“ segir Karl Héðinn.
