Málverk eftir hina þekktu Chicago-listakonu Gertrude Abercrombie, sem hafði verið týnt í áratugi, hefur selst á uppboði fyrir 1,35 milljónir Bandaríkjadala. Málverkið hafði skömmu áður verið keypt úr dánarbúi í Michigan fyrir aðeins 30 dali.

Verkið nefnist Alderman Merriam's Shells og var málað árið 1951. Á því má sjá safn skelja sem tilheyrði Robert Merriam, þáverandi borgarfulltrúa í Chicago. Merriam sat í borgarstjórn frá 1947 til 1955.

Málverkið var árið 1952 gefið lækninum John T. Reynolds í Kalamazoo í Michigan sem greiðsla fyrir læknisþjónustu. Verkið var sýnt í New York, Chicago, Milwaukee og Evanston á árunum 1952 og 1953 en eftir sýningu í Chicago árið 1953 hvarf það sjónum almennings.

Það kom aftur í leitirnar á þessu ári þegar maður í leit að vínylplötum á markaði rak augun í málverkið og kannaðist við nafn Abercrombie á bakhlið þess. Hann keypti verkið fyrir 30 dali.

Uppboðshúsið Freeman's Auctions áætlaði verðmæti þess upphaflega á bilinu 15 þúsund til 250 þúsund dali. Þegar hamarinn féll hafði verkið hins vegar verið slegið á 1,35 milljónir dala.

Samkvæmt uppboðshúsinu er það hæsta verð sem greitt hefur verið fyrir verk Abercrombie á uppboði. Listakonan lést árið 1977.