Lögreglan á höfuðborgarsvæðinu hafði í ýmsu að snúast í gærkvöldi og í nótt. Meðal verkefna voru slagsmál, líkamsárás, fíkniefnamál, þjófnaður og nokkur mál vegna gruns um akstur undir áhrifum.
Lögregla var meðal annars kölluð til vegna hávaðakvörtunar. Þegar lögreglumenn komu á vettvang fundu þeir mikla kannabislykt. Þrír voru handteknir, grunaðir um sölu og dreifingu fíkniefna, og vistaðir í fangaklefa í þágu rannsóknar málsins.
Í öðru tilviki var óskað eftir aðstoð lögreglu vegna slagsmála. Einn var handtekinn, meðal annars grunaður um að hafa beitt piparúða, og vistaður vegna rannsóknarinnar. Þá var tilkynnt um líkamsárás fyrir utan skemmtistað í miðborg Reykjavíkur. Málið er í rannsókn.
Lögregla þurfti einnig að hafa afskipti af einstaklingi sem var í tökum dyravarða. Samkvæmt dagbók lögreglu hafði viðkomandi verið til ama og veist að fólki. Hann neitaði að gefa upp nafn sitt að kröfu lögreglu og var vistaður í fangaklefa.
Nokkur umferðarmál komu einnig á borð lögreglu. Einn ökumaður var grunaður um akstur undir áhrifum ávana- og fíkniefna og lyfja, akstur á göngugötu og akstur sviptur ökuréttindum. Hann var jafnframt grunaður um vörslu fíkniefna og var látinn laus að lokinni blóðsýnatöku.
Í öðru máli stöðvaði lögregla ökumann eftir ábendingu um mögulegan fíkniefnaakstur. Ökumaðurinn reyndist grunaður um akstur undir áhrifum fíkniefna og voru bæði hann og farþegi bifreiðarinnar grunuð um nytjastuld og vörslu fíkniefna. Þau voru vistuð í þágu rannsóknar.
Fleiri ökumenn voru stöðvaðir vegna gruns um akstur undir áhrifum áfengis eða fíkniefna. Þá óskaði matvöruverslun eftir aðstoð lögreglu vegna þjófnaðar og var málið afgreitt samkvæmt hefðbundnu ferli.
