Fjölskylduhús við Bæjargil 5 í Garðabæ hefur verið sett á sölu fyrir 183,9 milljónir króna. Húsið var reist árið 1986 og hefur að sögn fasteignasala verið endurnýjað að verulegu leyti á undanförnum árum, bæði að innan og utan.

Í húsinu eru fjögur rúmgóð svefnherbergi sem öll eru staðsett á efri hæð ásamt aðalbaðherbergi. Á neðri hæðinni er meðal annars stór stofa og borðstofa, sólstofa, eldhús, þvottahús og gestasalerni. Nýlegt parket er á eigninni og hafa bæði baðherbergi hússins verið endurnýjuð á síðustu árum.

Við húsið er 32 fermetra bílskúr og hefur hluti hans verið útbúinn sem líkamsræktaraðstaða. Þá fylgir eigninni um 15 fermetra útigeymsla auk rúmgóðs bílastæðis.

Garðurinn við húsið hefur einnig verið tekinn í gegn. Þar er stór pallur ásamt bæði heitum og köldum potti og útisturtu. Garðurinn er sagður skjólsæll og vel hannaður.

Bæjargil er í rótgrónu íbúðahverfi í Garðabæ og stutt er frá húsinu í leik-, grunn- og framhaldsskóla auk íþróttahússins Mýrarinnar og annarrar þjónustu. Þá er í göngufæri Vetrarmýrin, þar sem unnið er að uppbyggingu umfangsmikillar íþróttaaðstöðu fyrir starfsemi Stjörnunnar.

Ásett verð eignarinnar er 183,9 milljónir króna.