Tveir karlmenn hafa verið dæmdir í fimm mánaða fangelsi hvor fyrir stórfellt fíkniefnalagabrot eftir að hafa flutt samtals 11.160 millilítra af kannabisvökva til Íslands. Efnin voru falin í farangurstöskum mannanna og ætluð til söludreifingar hér á landi.

Dómur féll í Héraðsdómi Reykjaness 30. september. Mennirnir, Christopher Warner Vezzetti og Hakeem Khaled Mashal, komu til Keflavíkurflugvallar með flugi frá Seattle í Bandaríkjunum 19. ágúst síðastliðinn.

Samkvæmt ákæru var kannabisvökvinn 81 prósents að styrkleika. Í tösku hvors manns fundust 5.580 millilítrar. Lögregla og tollgæsla fundu og lögðu hald á efnin þegar töskurnar komu til Keflavíkurflugvallar.

Í kjölfarið voru fíkniefnin tekin úr töskunum en þær síðan afhentar undir eftirliti lögreglu að Laugavegi í Reykjavík. Þar voru mennirnir handteknir þegar þeir tóku við töskunum.

Báðir játuðu brot sín skýlaust fyrir dómi og samþykktu upptöku fíkniefnanna. Fram kemur í dómnum að hvorugur þeirra hafi áður orðið uppvís að refsiverðri háttsemi svo kunnugt sé.

Dómurinn taldi jafnframt að ekki væri sýnt fram á að mennirnir hefðu átt fíkniefnin eða tekið þátt í skipulagningu kaupanna og innflutningsins. Þeir hefðu samþykkt að flytja efnin til landsins gegn greiðslu og gegnt hlutverki burðardýra.

Dómurinn taldi þó brotið alvarlegt, meðal annars vegna hins umtalsverða magns og þess að efnin voru ætluð til sölu. Hvor þeirra var dæmdur í fimm mánaða óskilorðsbundið fangelsi.