Valdimar Víðisson, fyrrverandi bæjarstjóri Hafnarfjarðar og oddviti Framsóknar í bænum, varar við því að leita að einum sökudólgi vegna þess að fyrirhuguð uppbygging Tækniskólans á hafnarsvæðinu í Hafnarfirði gekk ekki eftir.
Heimildin greindi frá.
Valdimar ræddi málið á bæjarstjórnarfundi og sagði verkefnið hafa verið umfangsmikið og flókið. Samningar við fjölmarga lóðarhafa á svæðinu hefðu tekið lengri tíma en upphaflega var gert ráð fyrir.
Hafnarfjarðarbæ tókst ekki að tryggja Tækniskólanum fyrirhugaða lóð á suðurhöfninni innan tilskilins tíma. Skólinn rifti í kjölfarið samningum við bæinn og hyggst leita að annarri framtíðarstaðsetningu.
Valdimar sat í meirihluta Sjálfstæðisflokks og Framsóknar meðan málið var til vinnslu og gegndi embætti bæjarstjóra frá árinu 2025 fram að síðustu sveitarstjórnarkosningum.
Viljayfirlýsing um framtíðarhúsnæði Tækniskólans var undirrituð í júlí 2021 og skuldbindandi samkomulag í júní 2024. Áform gerðu ráð fyrir um 30 þúsund fermetra skóla fyrir um þrjú þúsund nemendur og að framkvæmdum lyki árið 2029.
Valdimar sagði starfsfólk bæjarins, kjörna fulltrúa og stjórnendur Tækniskólans hafa lagt mikla vinnu í verkefnið. Aðkoma fjölmargra lóðarhafa hefði hins vegar flækt málið.
Guðmundur Árni Stefánsson, fyrrverandi oddviti Samfylkingarinnar í Hafnarfirði, hefur gagnrýnt meðferð málsins og sagt Valdimar og Rósu Guðbjartsdóttur, fyrrverandi bæjarstjóra, bera höfuðábyrgð á niðurstöðunni.
Valdimar sagði Framsókn nú vilja horfa fram á veginn og vinna með öðrum að framtíðaruppbyggingu hafnarsvæðisins. Flokkurinn lýsti jafnframt yfir vonbrigðum með niðurstöðuna og óskaði Tækniskólanum velfarnaðar við að finna nýja framtíðarlausn.
