Karlmaður hefur verið sýknaður í Héraðsdómi Vesturlands af ákæru um fjárdrátt upp á samtals 686.150 krónur. Maðurinn var ákærður fyrir að hafa dregið sér fé úr fyrirtæki þar sem hann starfaði sem framkvæmdastjóri og hafði prókúru.

Samkvæmt ákæru millifærði maðurinn tvær greiðslur af reikningi fyrirtækisins inn á persónulegan bankareikning sinn árið 2023. Önnur greiðslan nam 456.150 krónum en hin 230.000 krónum. Ákæruvaldið taldi að millifærslurnar hefðu verið gerðar án heimildar og í eigin þágu mannsins.

Maðurinn neitaði sök og hélt því fram að um fyrirframgreidd laun hefði verið að ræða. Hann sagði eiganda fyrirtækisins hafa samþykkt greiðslurnar og að ætlunin hefði verið að gera þær upp síðar.

Dómurinn taldi gögn málsins ekki nægja til að sanna að maðurinn hefði haft ásetning til fjárdráttar. Fram kom að fyrirframgreiðslur launa hefðu tíðkast hjá fyrirtækinu og að framburður eigandans hjá lögreglu hefði stutt að minnsta kosti að hluta frásögn ákærða um að greiðslurnar hefðu verið heimilaðar.

Dómurinn gagnrýndi jafnframt rannsókn málsins og taldi að ekki hefði verið rannsakað nægilega hvernig fyrirframgreidd laun hefðu almennt verið meðhöndluð hjá fyrirtækinu.

Þá þótti það styðja málstað ákærða að hann hefði sjálfur leitað til stéttarfélags eftir starfslok og upplýst þar um óuppgerð fyrirframgreidd laun. Hann hefði ætlað að skuldajafna þau á móti launum og orlofi sem hann taldi sig eiga inni.

Dómurinn komst að þeirri niðurstöðu að ákæruvaldið hefði ekki sannað sök mannsins hafna yfir skynsamlegan vafa. Var hann því sýknaður.

Málsvarnarlaun verjanda hans, tæplega ein milljón króna, auk aksturskostnaðar, greiðast úr ríkissjóði.