Glæsilegt einbýlishús við Hólprýði 5 í Garðabæ hefur verið sett á sölu fyrir 250 milljónir króna. Eignin er samtals 282,1 fermetri og stendur á rúmlega 1.500 fermetra hraunlóð í Prýðahverfi.
Húsið var reist árið 1984 og teiknað af Vífli Magnússyni arkitekt. Sjálft íbúðarhúsið er 203,3 fermetrar á tveimur hæðum en við það er 78,8 fermetra þrefaldur bílskúr. Þar að auki er rúmgott og manngengt geymsluloft yfir bílskúrnum sem er ekki talið með í skráðri fermetrastærð eignarinnar.
Á neðri hæð hússins eru meðal annars þrjú svefnherbergi, eldhús, baðherbergi, þvottahús og opið rými þar sem hol, borðstofa og sjónvarpshol tengjast saman. Þaðan er gengið út á stóra verönd sem snýr í suður.
Á efri hæðinni er stór og björt stofa með mikilli lofthæð og arni. Úr stofunni er gengið út á svalir til vesturs. Þar er einnig rúmgóð hjónasvíta með sérbaðherbergi og svölum sem snúa til austurs.
Lóðin er 1.563 fermetrar og hefur náttúrulegu hrauninu að mestu verið leyft að halda sér. Í fasteignaauglýsingu er staðurinn sagður einstaklega kyrrlátur og skjólsæll, auk þess sem göngu- og hjólastígar eru í næsta nágrenni.
