Stefán Einar Stefánsson, fréttamaður og þáttastjórnandi Spursmáls, ræddi um innflytjendamál við Sölva Tryggvason í nýjasta hlaðvarpsþætti Sölva.

Í viðtalinu fjallaði Stefán Einar um meinta framgöngu múslima í íslensku samfélagi. Þar hélt Stefán Einar því fram að á fæðingardeild Landspítalans væri „standandi vandamál“ vegna kvenfyrirlitningar og yfirgangi frá hópi karlmanna. „Gríðarlega ljót framkoma gagnvart starfsfólki og mjög ljót framkoma gagnvart konunum með nýfædd börn, vegna þess að þetta eru hópar manna sem fyrirlíta konur,“ sagði Stefán Einar í myndbandsbroti sem er nú í dreifingu á samfélagsmiðlum. Fjallað var um frásagnir Stefáns Einars af fæðingardeildinni á fréttavef DV og Nútímans.

Stefán Einar hélt því fram að ekki væri rætt um málin, vegna ótta starsfólks. „Þetta er veruleikinn, en heilbrigðisstarfsfólkið myndi aldrei mæta í svona viðtal og ræða opinskátt um það. Það ætlar ekki að lenda í þessum hnífamönnum eða þessum yfirgangsseggjum, sem telja að þeir geta komið hér eins og fínir menn og vaðið yfir samfélagið á skítugum skónum.“

Kannast ekki við sögur Stefáns

„Þessi ummæli komu starfsfólki kvennadeildar sem ég hef rætt við í opna skjöldu. Þau kannast ekki við þessar lýsingar,“ segir Hulda Hjartardóttir, yfirlæknir á fæðingardeild Landspítalans, í svari við fyrirspurn Mannlífs um hvort frásögn Stefáns Einars samsvari reynslu starfsfólksins.

„Fæðing er stórviðburður í lífi fjölskyldna og oft fylgja áhyggjur, streita og þreyta hjá aðstandendum þó að oftast sé ríkjandi tilfinningin gleði. Starfsfólk deildarinnar þarf stöku sinnum að leiðbeina aðstandendum fæðandi kvenna við að hemja tilfinningar sínar og hefur til þess ýmsar leiðir og er því yfirleitt vel tekið. Þetta á jafnt við um aðstandendur af báðum kynjum og er óháð trú og uppruna. Afar sjaldgæft er að aðstandendur sýni hegðun sem telja má ógnandi og ekki hefur verið tekið eftir aukningu á slíkum tilvikum,“ segir Hulda.

Eiríkur Bergmann Einarsson stjórnmálafræðingur hefur rannsakað sérstaklega uppgang hægri öfgafólks, þjóðernispopúlisma og samsæriskenning í Evrópu.

„Ég veit ekki í hvað hann er að vísa nákvæmlega en það er hins vegar alveg klassískt að lýsa innflytjendum sem framandi verum sem aðhyllast síður gildi landsins sem þeir koma til og séu einhvern vegin ógn við frið og stöðugleika,“ segir Eiríkur Bergmann í samtali við Mannlíf.

Stefán Einar Stefánsson og Sölvi Tryggvason ræddu um meintan kynþáttahatur múslima gegn hvítum Íslendingum og tóku fyrir dæmi bæði í Breiðarholtskóla og á Kvennadeild Landspítalans.

„Við höfum séð að það er mjög gjarnan alið á ótta í garð útlendinga og innflytjenda í vestrænum samfélögum og þetta er að koma hingað með sama hætti og alls annars staðar,“ segir Eiríkur. Hann lýsir hvernig lítil atvik eru gerð að stórum málum og verða vopn í höndum fólks með fordóma. „Árekstrarnir eru blásnir upp og oft er reykur sem verður að miklum eldi,“ segir Eiríkur og heldur síðan áfram. „Í vestrænum samfélögum er þetta oft blásið upp úr öllu valdi og mjög margt tekið úr samhengi við raunveruleikann.“