Mikil ólga er innan Borgarholtsskóla vegna framkomu Ársæls Guðmundssonar skólameistara en hann hefur verið mikið í fréttum eftir að tilkynnt var að Guðmundur Ingi Kristinsson, mennta- og barnamálaráðherra, tilkynnti að staða Ársæls yrði auglýst.

DV hefur að undanförnu fjallað um ósættið innan skólans.

DV tók viðtal við Bryndísi Valberg, kennara við skólann. Bryndís kærði skólameistarann fyrir einelti en menntamálaráðuneytið mat það svo að um ágreining hafi verið að ræða. Hún segir við DV að hún muni kæra þann úrskurð til Umboðsmanns Alþingis.

Í viðtalinu ræðir Bryndís fund sem haldinn var í Borgarholtsskóla í gær.

„Á fundinum í Borgarholtsskóla í gærmorgun tilkynnti Ársæll starfsfólki að hann væri reiður út af fréttaflutningi DV og skammaði starfsfólk fyrir að ræða við fjölmiðla. Hann talar alltaf um sjálfan sig í þriðju persónu. Mjög sérstakur kækur.  Jafnframt skammaði hann kennara og sagði að það væri uppljóstrari í kennarahópnum sem væri að skemma fyrir honum og hann stóð í hótunum gagnvart þessum uppljóstrara. Hann taldi sig verða fyrir árásum og vorkenndi sér. Hann ræddi jafnframt um sinn sérstaka húmor, þegar umræða um púsluspilið góða, sem gerði lítið úr DV, barst í tal,“ segir Bryndís um Ársæl.

„Lýðræðisleg vinnubrögð hurfu úr skólanum þegar hann tók við störfum. Hann er algjörlega einráður harðstjóri.“