Heimspekingurinn Alexander Dugin, sem gjarnan er titlaður „heili Pútíns“ í vestrænum fjölmiðlum vegna hugmyndafræðilegra áhrifa hans, segir í grein hjá ríkisreknu rússnesku fréttastofunni RIA að Donald Trump hafi nú hafið þriðju heimsstyrjöldina.

„Sprengjuárás bandaríska flughersins á kjarnorkumannvirki Írans er upphaf þriðju heimsstyrjaldarinnar,“ skrifar Dugin.

Alexandr Dugin er ofurþjóðernissinni og er hugmyndafræði hans kennd við ný-stalínisma og ný-evrasíuisma, sem snýst um að lönd Rússneska keisaradæmisins og síðar Sovétríkjanna myndi náttúrulega heild.

„Kjarnorkuvopn stöðva engann lengur og árásirnar á kjarnorkuinnviði hafa nú verið samþykktar bæði af Ísrael, sem hefur ekki fengið afgerandi viðbrögð á alþjóðavettvangi, og nú einnig af Bandaríkjunum. Stigið hefur verið yfir svo margar rauðar línur að óljóst er hvort nokkrar séu eftir sem ekki hafa verið rofnar,“ skrifar Dugin.

Dugin er staðfastur stuðningsmaður Vladimirs Pútín Rússlandsforseta, en gegnir ekki opinberri stöðu í stjórn hans.

Vladimír Pútín, fordæmdi á mánudag árásir á Íran sem „tilefnislausar“ og „réttlætingarlausar“ árásir í fundi með utanríkisráðherra Teheran, Abbas Araghchi, en tilkynnti ekki um neinn áþreifanlegan stuðning við helsta bandamann sinn í Miðausturlöndum.

Rússland er mikilvægur bakhjarl Írans, en hefur ekki staðið ákveðið með bandamanni sínum þrátt fyrir að Bandaríkin hafi ráðist á kjarnorkumannvirki landsins um helgina.

„Þessi árás, sem var algjörlega án tilefnis, er algjörlega óréttlætanleg,“ sagði Pútín í sjónvarpaðri yfirlýsingu við upphaf fundarins með Araghchi.

Pútín nefndi ekki sérstaklega árásir Bandaríkjanna, heldur talaði almennt um „árásir“ á Íran, þó Rússar hefðu fyrr sama dag fordæmt og harmað árásirnar.

„Það hefur orðið ný og alvarleg spennuaukning á svæðinu og að sjálfsögðu fordæmum við það og lýsum yfir djúpum harmi í því samhengi,“ sagði talsmaður Kreml, Dmitríj Peskov, við fréttamenn skömmu áður en Pútín hitti Araghchi í Kreml.

Pútín hefur stillt sér upp sem milligöngumaður milli Írans og Ísraels, hugmynd sem Donald Trump Bandaríkjaforseti hafnaði í síðustu viku.

Araghchi sagði við Pútín að Rússland hefði verið „félagi og samverkamaður“ Teheran og hrósaði mjög nánum og langvarandi tengslum milli Teheran og Moskvu.

„Íran er að beita lögmætri sjálfsvörn gegn þessum árásum,“ bætti hann við.

Síðan Ísrael hóf árásir sínar 13. júní, sem leiddu til viðbragða Írans með eldflaugum og drónum, hefur Rússland ekki lýst yfir neinum opinberum hernaðarstuðningi við Teheran.

Pútín og aðrir embættismenn hafa einnig dregið úr vægi skuldbindinga Moskvu samkvæmt víðtækum stefnumiðuðum samstarfssamningi sem undirritaður var við Íran fyrir aðeins nokkrum mánuðum, og hafa bent á að það sé ekki gagnkvæmt varnarsamkomulag.

Rússland sé að „leggja sitt af mörkum til að styðja íransku þjóðina,“ sagði Pútín.