Í tilkynningu frá MAST er greint frá störfum stofnunarinnar í apríl. Þar segir að lögð hafi verið stjórnvaldssekt að upphæð 500.000 kr. á fiskeldisfyrirtæki í suðausturumdæmi vegna brota á lögum um dýravelferð.

Fyrirtækið vanrækti, samkvæmt MAST, að fjarlægja sjúka eða slasaða fiska úr eldiskvíum og aflífa þá eins og skylt er.

Þá skildi kattareigandi í suðvesturumdæmi læðu með kettlinga eina eftir á heimili sínu án fóðurs og vatns. Að auki er bannað að skilja kettlinga yngri en 16 vikna eftir eina og án eftirlits lengur en sex klukkutíma í senn.

Kattareigandinn var því sviptur vörslum dýranna og þeim komið í fóstur.

Úrbætur á kostnað bónda

Sauðfjárbóndi í norðausturumdæmi vanfóðraði kindur og hafði of mikinn þéttleika á þeim.

Þar sem hann taldist ekki ráða einn við búið var honum tilkynnt að MAST myndi ráða vinnumann út sauðburðinn honum til aðstoðar. Þetta yrði gert á kostnað bóndans.

Þá var bóndi í norðvesturumdæmi var sviptur mjólkursöluleyfi 4. apríl en veitt það að nýju 10. apríl eftir endurbætur. Lagðar voru dagsektir á bóndann að upphæð 10.000 kr. á dag til að knýja fram bætta hópaskiptingu, fóðrun, hreinleika og brynningu í uppeldi nautgripa og einnig til að draga úr þéttleika.

Rekstur hestaleigu stöðvaður

Rekstur hestaleigu í suðausturumdæmi var stöðvaður vegna brota á velferð hrossanna að sögn MAST.

Gerð var krafa um að horuðustu hestarnir yrðu aflífaðir innan viku eða ráðstafað til ábyrgra aðila sem Matvælastofnun viðurkenndi. Öðrum hrossum yrði ráðstafað til annarra innan 4 vikna.

MAST sagði einni frá nautgripabónda í norðausturumdæmi sem braut á velferð dýranna. Fóðrun og brynningu ábótavant og einnig skjóli. Lagðar voru á hann dagsektir að upphæð 10.000 kr. á dag til að knýja á um úrbætur.