Veðurstofa Íslands hefur sett á óvissustig vegna snjóflóðahættu á Austfjörðum þar sem búist er við versnandi veðri. Þó er ekki talin hætta fyrir byggð að svo stöddu, en vöktun hefur verið hert. Þetta kemur fram í frétt Austurfréttar.
Samkvæmt Magnúsi Hreini Jónssyni, fagstjóra ofanflóðamála, er spáð austanstórhríð síðar í dag og áframhaldandi hvössum norðaustanáttum með mikilli úrkomu í nótt. Slík skilyrði geta aukið líkur á snjóflóðum á þekktum hættusvæðum.
Gul veðurviðvörun var gefin út í gær fyrir Austfirði og Austurland vegna hvassviðris og snjókomu og gildir hún fram á morgundag. Óvissustig tók gildi á flestum fjallvegum síðdegis í gær og hefur meðal annars verið lokað yfir Fjarðarheiði. Þá er þungfært á Fagradal og Vatnsskarði og sérstaklega hefur verið bent á snjóflóðahættu á Fagradal.
Óvissustig þýðir að veðurfar geti þróast þannig að hætta skapist fyrir fólk eða byggð, og því eru viðbragðsaðilar í viðbragðsstöðu ef grípa þarf til aðgerða, svo sem rýminga.
Aðfaranótt sunnudags féllu fjórtán snjóflóð á Austfjörðum eftir snjókomu. Flest þeirra féllu ofan Neskaupstaðar, auk flóða á Fagradal og úr Bjólfi við Seyðisfjörð. Flóðin voru lítil að umfangi, en búist er við meiri snjókomu með veðrinu sem nú er í aðsigi.
Almannavarnir hvetja íbúa á Austurlandi til að fylgjast vel með veðurspám og færð á næstu dögum.
