Gríska eyjan Atokos hefur á skömmum tíma orðið að vinsælum áfangastað ferðamanna sem sækjast eftir heldur óvenjulegri upplifun. Á strönd eyjunnar geta gestir synt í tærum sjónum innan um hópa svartra svína sem virðast una sér vel við strandlífið.
Atokos er lítil eyja skammt frá Ithaka og er í einkaeigu. Hún var lengi lítt þekkt meðal erlendra ferðamanna en myndskeið af svínunum á ströndinni hafa farið eins og eldur í sinu á samfélagsmiðlum, einkum Instagram og TikTok.
Svínin halda sig að mestu á ströndinni þar sem þau leita að æti í sandinum. Inn á milli ganga þau út í sjó og synda eða kæla sig í vatninu. Ferðamenn hafa einnig tekið upp á því að synda með dýrunum og gefa þeim mat.
Ferðaþjónustuaðilinn Renato Bisha siglir með ferðamenn frá Ithaka til eyjunnar nokkrum sinnum á dag. Að hans sögn hefur eftirspurn eftir ferðum til Atokos aukist verulega eftir að svínin urðu þekkt á samfélagsmiðlum. Sambærilegar dagsferðir eru nú einnig farnar frá eyjunum Lefkada og Kefalonia.
„Eyjan hefur orðið mjög vinsæl vegna svínanna og margir biðja sérstaklega um að fá að koma til Atokos,“ segir Bisha.
Ferðamenn sem heimsótt hafa eyjuna lýsa upplifuninni sem einstakri. Bandaríski ferðamaðurinn Jamie Jackson sagðist aldrei hafa ímyndað sér að hún ætti eftir að synda með svínum í Grikklandi og mælti eindregið með heimsókninni.
Atokos tekur nú á móti þúsundum gesta, einkum yfir annasömustu sumarmánuðina, og hafa svínin þannig orðið að óvæntu aðdráttarafli á þessari litlu eyju.
