Dramatísk viðureign hunds og hlébarða náðist á myndband í Rudraprayag-héraði í norðurhluta Indlands á þriðjudag.

Á upptökunni sést hlébarðinn læðast inn í garð þar sem hundurinn liggur sofandi á borði. Rándýrið stekkur skyndilega á hundinn, grípur hann um hálsinn og dregur hann niður á jörðina.

Hundurinn veitir hins vegar harða mótspyrnu og tekst á við hlébarðann í nokkra stund. Eftir átökin virðist hlébarðinn gefast upp og hörfar úr garðinum. Hundurinn lætur þar þó ekki staðar numið heldur eltir rándýrið á brott.

Skömmu síðar sést eigandi hundsins koma út í garðinn.

Myndbandið hefur vakið mikla athygli og jafnframt áhyggjur meðal íbúa á svæðinu. NDTV greinir frá því að kallað hafi verið eftir auknu eftirliti skógræktaryfirvalda vegna hlébarða í nágrenninu.

Atvik þar sem hlébarðar leita inn á byggð svæði hafa ítrekað vakið áhyggjur í ýmsum héruðum Indlands, ekki síst vegna hættu sem getur skapast fyrir bæði fólk og húsdýr.