Bandarískur lögmaður í Ohio, sem nýverið var sakfelldur fyrir tilraun til manndráps á fyrrverandi eiginkonu sinni, er sagður hafa þóst vera lögreglumaður þegar hann reyndi að verða sér úti um skotvopn árið 2024.

Maðurinn, Matthew Exton, var handtekinn eftir að myndskeið náðist af honum reyna að skjóta fyrrverandi eiginkonu sína inni á veitingastað. Samkvæmt bandarískum fjölmiðlum virðist öryggi skotvopnsins hafa verið á þegar hann reyndi að hleypa af. Vegfarendur og gestir veitingastaðarins náðu að yfirbuga hann og taka af honum vopnið áður en lögregla kom á vettvang.

Í nýjum gögnum sem saksóknarar hafa lagt fram er rakin saga fyrri atvika sem þeir telja skipta máli í málinu. Þar kemur meðal annars fram að Exton hafi árið 2024 gefið sig út fyrir að vera lögreglumaður í því skyni að kaupa nýtt skotvopn.

Saksóknarar segja einnig að fyrir liggi talhólfsskilaboð frá apríl 2024 þar sem hann hafi hótað að drepa þolendur málsins. Þá séu til staðar sambærileg textaskilaboð, póstkort sem sent var til annars þolandans og upptaka úr Ring-öryggismyndavél þar sem hann er sagður missa stjórn á skapi sínu.

Í gögnum málsins er jafnframt vísað til lögregluskýrslu frá apríl 2024 vegna atviks þar sem Exton er sagður hafa farið inn á heimili þolendanna að næturlagi án leyfis. Sonur konunnar hefur einnig borið að Exton hafi sagt við hann að hann gæti „drepið hvern sem er og komist upp með það“.

Að mati saksóknara benda gögn málsins til þess að Exton hafi haft fyrirfram ákveðna áætlun gagnvart þolendunum og að árásin á veitingastaðnum hafi því ekki verið mistök eða skyndiákvörðun.

Exton hefur nú verið sakfelldur fyrir tilraun til manndráps. Refsing hans verður ákveðin síðar í september.