Matvælastofnun (MAST) hefur ákveðið að gefa út ný rekstrarleyfi fyrir fiskeldi í Seyðisfirði í Múlaþingi. Leyfin heimila allt að 10.000 tonna eldi, þar af að hámarki 6.500 tonn af frjóum laxi.

Burðarþolsmat Hafrannsóknastofnunar gerir ráð fyrir allt að 10.000 tonna lífmassa í firðinum. Áhættumat vegna erfðablöndunar takmarkar hins vegar eldi frjós lax við 6.500 tonn. Því eru gefin út tvö leyfi, annars vegar fyrir frjóum laxi og hins vegar ófrjóum.

Tillögur að leyfunum voru auglýstar í desember 2024 og bárust alls 186 athugasemdir. Að sögn MAST voru um 75 prósent þeirra samhljóða. Þá bárust níu jákvæðar umsagnir.

Ákvörðunina má kæra til úrskurðarnefndar umhverfis- og auðlindamála innan eins mánaðar frá birtingu auglýsingarinnar.