Icelandair hefur gert tímabundnar breytingar á flugáætlun sinni til Akureyrar og Egilsstaða vegna nauðsynlegs viðhalds á einni af DHC 8 Q400-flugvélum félagsins. Breytingarnar munu standa yfir næstu vikur.

Til að draga úr áhrifum þeirra bætir Icelandair við 15 aukaferðum, alls 30 flugleggjum, til Akureyrar og Egilsstaða frá og með morgundeginum, 10. september, og næstu tvær vikurnar.

Sætaframboð verður þó tímabundið minna en venjulega. Icelandair segir unnið að því að tryggja farþegum sem besta þjónustu og flugframboð.

Félagið biðst velvirðingar á óþægindunum og hvetur þá sem hyggjast ferðast innanlands á tímabilinu til að bóka flug með fyrirvara.