Fimm héraðsdómarar hafa sótt um tvö embætti dómara við Landsrétt sem auglýst voru laus til umsóknar 21. ágúst síðastliðinn.

Um er að ræða annars vegar fasta stöðu dómara sem skipað verður í eins fljótt og auðið er og hins vegar tímabundna setningu sem gildir til loka febrúar 2029.

Umsóknarfrestur rann út 7. september og sömu fimm einstaklingarnir sækja um bæði embættin. Það eru Björn L. Bergsson, Halldóra Þorsteinsdóttir, Hulda Árnadóttir, Ragnheiður Snorradóttir og Sigríður Elsa Kjartansdóttir. Öll starfa þau nú sem héraðsdómarar.

Næsta skref er að umsóknirnar verði sendar dómnefnd um hæfni umsækjenda um embætti dómara. Nefndin fer yfir hæfni umsækjendanna og skilar síðan umsögn sinni til ráðherra áður en ákvörðun verður tekin um hverjir fá embættin tvö.