Lögreglan í Vestmannaeyjum hvetur í færslu á Facebook fólk sem tekur þátt í björgun lundapysja þessa dagana til að gæta fyllstu varúðar, sérstaklega við sleppisvæðið við Ofanleitishamar. Að minnsta kosti tvö atvik hafa komið upp þar sem litlu munaði að illa færi.

Pysjutímabilið stendur nú sem hæst í Vestmannaeyjum og fjölmargir leggja sitt af mörkum við að finna pysjur og koma þeim öruggum til sjávar. Lögreglan segir mikilvægt að fólk fari að öllu með gát við björgunina.

Sérstök athygli er vakin á sleppisvæðinu við Ofanleitishamar, þangað sem fjöldi fólks kemur til að sleppa pysjum. Lögreglu hafa borist ábendingar um að fólk standi fyrir utan hlaðna veggi á svæðinu, nærri hárri bjargbrún.

Í að minnsta kosti tveimur tilfellum hafi börn misst frá sér pysjur og reynt að ná þeim aftur. Við það hafi þau farið út fyrir veggina og komist hættulega nærri bjargbrúninni.

Lögreglan biðlar því eindregið til pysjubjörgunarfólks að standa fyrir innan hlaðna veggi þegar pysjum er sleppt og tryggja að börn fari ekki út fyrir þá.

„Pysjubjörgun skapar skemmtilegar og góðar minningar fyrir fjölskylduna og forsenda þess er að allir komi heilir heim,“ segir lögreglan.