Lögregla sinnti fjölbreyttum verkefnum á höfuðborgarsvæðinu í gærkvöldi og í nótt. Meðal annars var tilkynnt um rán, innbrot, líkamsárás og bílbruna.

Brotist var inn í heimahús í Laugardalnum í Reykjavík og þaðan stolið lausamunum. Ekki kemur fram í dagbók lögreglu hversu verðmætir munirnir voru eða hvort einhver hafi verið handtekinn vegna málsins.

Í Hafnarfirði réðust tveir ungir drengir að dreng á svipuðum aldri. Þeir neyddu hann af hlaupahjóli sínu og tóku hjólið. Lögregla hafði uppi á drengjunum og hlaupahjólinu skömmu síðar.

Þá var einstaklingur handtekinn vegna líkamsárásar í Hafnarfirði og vistaður í fangaklefa.

Talsvert var einnig um verkefni tengd veðri. Lögregla var kölluð á tvo staði í Hafnarfirði vegna vinnupalla og þakplatna sem voru að fjúka. Gerðar voru ráðstafanir til að koma í veg fyrir tjón.

Eldur kviknaði jafnframt í mannlausri bifreið fyrir utan bifreiðaverkstæði í Hafnarfirði. Slökkvilið slökkti eldinn en bifreiðin varð gjörónýt. Skemmdir urðu einnig á annarri bifreið sem stóð við hlið hennar og á verkstæðinu.

Í póstnúmeri 108 í Reykjavík var lögregla kölluð að söluturni vegna einstaklings sem var í annarlegu ástandi sökum ölvunar. Viðkomandi var fluttur á lögreglustöð en sleppt eftir að hafa lofað bót og betrun.

Þá var maður handtekinn í Kópavogi vegna ástands hans eftir fíkniefnaneyslu. Hann var talinn ófær um að vera úti meðal fólks og vistaður í fangaklefa þar sem ekki reyndist unnt að koma honum í annað húsaskjól.

Loks var lögregla kölluð að meðferðarúrræði í Árbænum til að stilla til friðar eftir að aðstæður þar höfðu farið úr böndunum.