Mikill mannfjöldi sótti menningar- og fjölskylduhátíðina Ljósanótt í Reykjanesbæ um helgina, sem nú var haldin í 25. sinn. Þrátt fyrir blíðskaparveður og fjölbreytta dagskrá var hátíðin ekki án vandamála, en lögregla þurfti að bregðast við líkamsárásum og talsverðri ölvun, sérstaklega á meðal ungmenna. Hátíðargestir lýsa einnig vaxandi áhyggjum af öryggi og breyttri stemningu á svæðinu.
Fjórir handteknir og talsverð ölvun
Samkvæmt frétt á Vísi hafði lögreglan á Suðurnesjum í mörgu að snúast eftir að formlegri dagskrá lauk á laugardagskvöldinu, þegar stórtónleikarnir og flugeldasýningin fóru fram. Bjarney Annelsdóttir, yfirlögregluþjónn, staðfesti að minnst fjórir einstaklingar hefðu verið vistaðir í fangageymslu. Snérist ein handtakan um grun um líkamsárás.
Þá barst lögreglu fjöldi tilkynninga um eignaspjöll og ölvun. Í tilkynningu lögreglu kom fram að nokkuð mikið hafi verið um að ungmenni væru ölvuð á hátíðarsvæðinu, en tekið var fram að engin alvarleg slys hefðu orðið á fólki um nóttina.
„Stemningin breyttist á augabragði úr hátíð í óöryggi“
Heimamenn og gestir hafa lýst áhyggjum sínum af ástandinu á samfélagsmiðlum og bendir margt til þess að skipuleggjendum hafi reynst erfitt að halda aftur af áfengisneyslu ólögráða barna. Jón Ásgeir Þorkelsson, sem sótti hátíðina ásamt eiginkonu sinni, lýsti upplifun sinni í færslu á opinberri síðu sinni og sagðist gáttaður á því ástandi sem mætti þeim.
„Unglingadrykkja var áberandi og ótrúlega margir unglingar virtust hafa komið af höfuðborgarsvæðinu,“ skrifar Jón Ásgeir. Hann segir að ástandið hafi stigmagnast fljótt á ákveðnum tímapunkti. „Rétt þar sem við hjónin stóðum brutust út slagsmál og stemmingin breyttist á augabragði úr hátíð í óöryggi.“
Jón Ásgeir benti einnig á að pólitísk dægurmál og fánatök hafi sett svip sinn á hátíðina, sem honum fannst miður þar sem Ljósanótt ætti fremur að snúast um samfélagið, menninguna og gleðina en pólitískar deilur.
Spurt um framtíðarstefnu hátíðarinnar
Þrátt fyrir gagnrýnina leggur Jón Ásgeir áherslu á að ábyrgðin liggi ekki hjá þeim sem standa vaktina. „Það er þó ekki sanngjart að kenna lögreglunni eða starfsfólki hátíðarinnar um allt sem gerðist. Þau geta ekki stjórnað hegðun allra sem sækja hátíðina,“ skrifar hann en hvetur samfélagið til að staldra við. „Við þurfum að spyrja okkur hvort við séum að stefna í rétta átt og hvernig við getum tryggt að Ljósanótt verði áfram sú bæjarhátíð sem fólk vill geta notið í öryggi og sátt.“
Hátíðinni lauk formlega á sunnudagskvöld með rólegri dagskrá, þar á meðal sögugöngu og minningartónleikum um Gunnar Þórðarson í Hljómahöll. Ljóst er að umræðan um öryggismál og unglingadrykkju á stórum bæjarhátíðum mun halda áfram í kjölfar helgarinnar.
