Maður í Connecticut í Bandaríkjunum hefur verið ákærður eftir að eins árs sonur hans lést eftir að hafa verið skilinn eftir í bifreið í miklum hita.

Samkvæmt lögreglunni í East Windsor hafði faðirinn, Kevin Pell, samband við neyðarlínuna í síðasta mánuði og greindi frá því að hann hefði skilið drenginn eftir í bílnum þar sem hann hefði verið sofandi. Pell fór á meðan til vinnu á jarðarberjabúi fjölskyldunnar.

Þegar hann sneri aftur að bifreiðinni var drengurinn orðinn blár og andaði ekki, að því er fram kemur í gögnum málsins. Pell hóf endurlífgun og hélt henni áfram þar til viðbragðsaðilar komu á vettvang og tóku við.

Samkvæmt húsleitarheimild, sem PEOPLE hefur undir höndum, sagði Pell upphaflega að loftkæling bifreiðarinnar hefði ekki verið í gangi. Hann mun síðar hafa sagt lögreglu að kveikt hefði verið á henni.

Í gögnum lögreglu kemur fram að bifreiðinni hafi verið lagt í beinu sólarljósi og að allir gluggar, auk sóllúgu, hafi verið lokaðir. Aðstæður í bifreiðinni hafi því ekki verið öruggar fyrir barnið.

Drengurinn var fluttur á Connecticut Children's Medical Center þar sem hann var úrskurðaður látinn.

Pell hefur verið ákærður fyrir að hafa stofnað barni í hættu. Lögregla segir rannsókn málsins enn standa yfir og að frekari ákærur kunni að verða gefnar út.

Pell kom fyrir dómara á fimmtudag en tók ekki afstöðu til sakargifta. Næsta þinghald í máli hans er fyrirhugað í næsta mánuði.