Fjölskyldufríið í Taílandi átti að verða einstakt. Jól, áramót og fimm ára afmæli í hitanum.

Í staðinn varð dvölin allt öðruvísi fyrir hinn fjögurra ára gamla Adrian og fjölskyldu hans, eftir að hann slasaðist á hótelinu þar sem þau dvöldu á Koh Lanta.

Slysið átti sér stað 21. desember, aðeins tveimur dögum eftir að fjölskyldan kom til Taílands og á hótelið.

„Við vorum nýbúin að borða hádegismat á ströndinni og vorum komin aftur á hótelið. Adrian þurfti að fara á klósettið og var á leið inn í bústaðinn þar sem frændi hans var einnig inni, segir móðir hans, hin sænska Sarah Hedström í samtali við Aftonbladet.

En þegar Adrian ætlaði að fara inn tók hann ekki eftir því að glerhurðin var lokuð og gekk beint á hana.

„Þetta tók aðeins nokkrar sekúndur. Ég heyrði brothljóð og svo fór hann að öskra,“ segir Sarah.

Adrian hlaut fjölmarga skurði og Sarah fór að kalla á hjálp og biðja einhvern um að hringja á sjúkrabíl. Fyrir algjöra tilviljun voru bæði svæfingalæknir frá Stokkhólmi og slökkviliðsmaður frá Danmörku á hótelinu. Þau komu hlaupandi og gátu veitt fyrstu hjálp þar til sjúkrabíllinn kom á staðinn.

239 spor

Adrian og móðir hans voru fyrst flutt á heilsugæslustöð þar sem stærstu sárin voru saumuð tímabundið. Því næst voru þau flutt á stærra sjúkrahús í Trang, þar sem Adrian gekkst undir um fjögurra klukkustunda aðgerð.

„Hann endaði með 239 spor. Það er enn erfitt að átta sig á því,“ segir Sarah.

Eftir nokkra daga á sjúkrahúsi er fjölskyldan nú komin aftur á hótelið, þar sem fríið heldur áfram við allt aðrar aðstæður.

„Hann þolir hitann ekki vel eins og staðan er núna, þannig að við verðum að vera mikið inni á herberginu með loftkælingunni. Sárin klæja og hann er bólginn. Hvíld er lykilatriði.“

„Ósköp venjuleg glerhurð“

Sár Adrians eru reglulega skoðuð í samráði við lækni. Hann er með verki og getur ekki tekið þátt í leikjum og afþreyingu með eldri bróður sínum og frændsystkinum.

„Hann liggur mest í rúminu og horfir á iPad,“ segir Sarah.

Hún vill hvetja aðra ferðalanga til að huga sérstaklega að öryggi á hótelum í Taílandi.

„Þetta var ósköp venjuleg glerhurð. Það virðist ekki eðlilegt að barn sem vegur um 20 kíló geti gengið beint í gegnum hana.“

Eftir slysið hafa fleiri gestir hótelsins sett pappír og annað á glerhurðirnar til að gera þær sýnilegri.

„Fólk er hrætt um að þetta geti gerst aftur,“ segir Sarah.

Fjölskyldan hyggst dvelja í Taílandi til 10. janúar. Fimm ára afmæli Adrians nálgast og vonast er til að hann geti haldið upp á það.

„Við fengum ferðina í jólagjöf í fyrra og Adrian hefur beðið spenntur eftir að halda jól, áramót og afmælið sitt hér. Hann hefur hlakkað til í heilt ár og sagt öllum á leikskólanum frá því,“ segir Sarah.

Að svo stöddu er þó áherslan á að hann nái sér sem fyrst.

„Nú tökum við þetta einn dag í einu og einbeitum okkur að því að honum líði betur.“