Komið er að kosningu lesenda Mannlífs á „Manneskju ársins“ og hægt er að lesa hverjir eru tilnefndir hér fyrir neðan og kjósa.

Margir einstaklingar og hópar komu til greina en ritstjórn valdi þá ellefu sem eru hér fyrir neðan eftir miklar rökræður.

Niðurstaðan verður svo kynnt milli jóla og nýárs.

Tilnefndir eru:

Margrét Kristín Blöndal, betur þekkt sem Magga Stína, barðist af mikilli hörku fyrir lífi og réttindum íbúa á Gaza og var hluti af Frelsisflotanum svokallaða sem sigldi með hjálpargögn sem voru ætluð íbúum Gaza.

Félagsmenn félagsins Ísland Palestínu mótmæla við stjórnarráðið

Snorri Másson, varaformaður Miðflokksins, var kjörinn varaformaður flokksins á árinu eftir að hafa verið kjörinn á Alþingi í fyrra í fyrsta sinn. Er einn mælskasti þingmaður Íslands um þessar mundir. Dýrkaður af stuðningsmönnum en illa séður af andstæðingum.

Sigurður Kristófer McQuillan Óskarsson björgunarsveitarmaður lést í fyrra en áhrif hans á íslenskt samfélag á þessu ári eru óneitanleg. Neyðarkallinn í ár var tileinkaður Sigurði og mætti það mótstöðu hjá kynþáttahöturum á landinu vegna húðlitar Sigurðar. Neyðarkallinn seldist upp og hófst samtal um kynþáttafordóma og hvað það þýðir að vera Íslendingur.

Kristrún Frostadóttir forsætisráðherra er án vafa vinsælasti stjórnmálamaður Íslands en hún er að ljúka fyrsta heila ári sínu sem forsætisráðherra. Hún hefur náð að hrista af sér alla neikvæðni sem stjórnarandstaðan hefur reynt að festa á hana.

Gísli Þorgeir Kristjánsson handboltamaður er besti leikmaður besta handboltaliðs heims og sigraði bestu handboltakeppni heims í ár og var valinn besti leikmaður hennar.

Eygló Fanndal Sturludóttir lyftingakona náði þeim frábæra árangri að vera fyrsti Íslendingurinn til að verða Evrópumeistari í ólympískum lyftingum fullorðinna.

Ugla Stefanía Kristjönudóttir Jónsdóttir baráttukona hefur tekið slag eftir slag fyrir hönd trans fólks á Íslandi árum saman og hélt því áfram árið 2025 og var mikið þörf á því en andstaða við trans fólk hefur aukist til muna síðustu ár. Hún er ávallt rökföst og snjöll í umræðum.

Kolbeinn Kristinsson hnefaleikamaður vann sinn fyrsta titil í boxheiminum en hann er ósigraður sem atvinnumaður. Er í 68. sæti á lista yfir bestu hnefaleikmenn í þungavigt.

Stefán Jón Hafstein og stjórnendur RÚV stóðu með íslensku og palestínsku þjóðinni og drógu Ísland úr Eurovision í mótmælaskyni vegna þátttöku Ísrael.

RÚV sniðgengur Eurovision - Stefán Jón Hafstein

Hafþór Freyr Jóhannsson bjargaði tveggja ára systur sinni frá drukknun þrátt fyrir að vera aðeins 11 ára gamall en systir hans hafði fallið í sjóinn við bryggjuna í Neskaupstað.