Stefanía Helgadóttir skrifar opið bréf til bæjarráðs Fjarðabyggðar fyrir hönd Kvenfélagsins Nönnu í Neskaupstað og vill beina athygli bæjaryfirvalda að þeirri alvarlegu stöðu sem uppi er vegna fækkunar almenningsleikvalla í Neskaupstað.

Segir Stefanía í bréfinu sem birtist á vefmiðlinum Austurfrétt að kvenfélagið Nanna í Neskaupstað vilji „beina athygli bæjaryfirvalda að þeirri alvarlegu stöðu sem upp er kominn vegna fækkunar almenningsleikvalla í Neskaupstað.“

Hún segir að þessi „þróun veldur okkur miklum áhyggjum“ og bendir á að þegar Neskaupstaður hafi sameinast Fjarðabyggð árið 1998 verið þar fjöldi leikvalla,“ en nú tæpum 30 árum síðar er aðeins einn leikvöllur standandi.“

Stefanía nefnir að á einungis síðustu „þremur árum hafa þrír leikvellir verið fjarlægðir, án þess að nýir hafi komið í þeirra stað. Að sjálfsögðu eru gildar ástæður fyrir brottfalli einstakra leikvalla — einn þeirra fór meðal annars í snjóflóði — en það breytir því ekki að um er að ræða afturför sem dregur úr lífsgæðum íbúa bæjarins. Og það snertir sérstaklega þá sem síst skyldi: börnin okkar.“

Í Fjarðabyggð búa yfir eitt þúsund börn, þar af um 300 í Neskaupstað og í þeirra nafni vill „Kvenfélagið Nanna hvetja til tafarlausra aðgerða af hálfu bæjarfélagsins í þágu uppbyggingar grænna svæða og leikvalla, bæði í Neskaupstað og í sveitarfélaginu í heild.“

Og Stefanía spyr að því hver sé stefna Fjarðabyggðar er kemur að uppbyggingu grænna svæða og leikvalla, og er gert ráð fyrir nýjum leikvöllum í aðalskipulagi fyrir Neskaupstað, og spyr einnig hvenær sé gert ráð fyrir að framkvæmdir hefjist.

Hún segir að „undanfarið hefur verið aukin uppbygging í bænum. Nýir íbúar setjast hér að, brottfluttir koma heim, hús rísa og framtíðin björt. Börnin okkar eiga skilið gott umhverfi til að leika sér og þroskast í. Kvenfélagið Nanna er þess fullvisst að fjölgun leikvalla og tengdra grænna svæða myndi styrkja samfélagið og bæta lífsgæði íbúanna.“

Stefanía segir að lokum að með þessu bréfi „viljum við hvetja bæjaryfirvöld til að hrinda í framkvæmd þeim áætlunum sem þegar kunna að liggja fyrir. Ef slík stefna er ekki þegar til staðar, krefjumst við þess að hún verði mótuð og að uppbygging leikvalla og grænna svæða verði sett í forgang.“