Fuglavarp á Vatnsleysuströnd hefur dregist verulega saman á undanförnum árum og er staða kríunnar talin sérstaklega alvarleg. Umhverfis- og skipulagsnefnd Sveitarfélagsins Voga kallar nú eftir markvissum aðgerðum til að vernda varpsvæðin. Þetta kemur fram í umfjöllun Víkurfrétta.

Samkvæmt tilkynningu sem barst sveitarfélaginu hefur kríunni fækkað á varpsvæðum meðfram ströndinni. Talið er að aukin ásókn minka, refa og annarra rándýra á egg og unga sé helsta skýringin. Fjölgun þeirra er meðal annars rakin til greiðs aðgengis að æti á svæðinu.

Nefndin leggur til að sveitarfélagið hefji viðræður við minkaveiðimenn og refaskyttur, auk þess sem sérstakt fjármagn verði tryggt í fjárhagsáætlun til að standa straum af verndaraðgerðum.

Jafnframt hefur umhverfis- og skipulagssviði verið falið að ræða við íbúa og rekstraraðila við ströndina um hvernig megi draga úr aðgengi meindýra og ránfugla að æti.

Að mati nefndarinnar er mikilvægt að grípa til aðgerða sem fyrst til að vernda fuglalíf og tryggja framtíð varpsvæða á Vatnsleysuströnd.