Nýgift hjón, Alicia og Chase, voru á brúðkaupsferð í Excellence Oyster Bay hótelinu í Falmouth á Jamaíka þegar fellibylurinn Melissa gekk yfir og gestum var fylgt í neyðarskjól.

Parið hefur sætt harðri gagnrýni á netinu eftir að Alicia deildi myndböndum á TikTok af upplifun þeirra á fellibylnum. Notendur hafa sakað þau um að vera „algjörlega úr takti við raunveruleikann“ og lýstu myndböndunum sem „dystópískum“ þar sem starfsfólk hótelsins þjónaði þeim á meðan heimili starfsmannanna væru mögulega rústir einar.

Alicia, sem er hjúkrunarfræðingur frá New York og birtir efni á TikTok undir notandanafninu @aliciad729, sagði í fyrstu færslu sinni að ástandið væri „mjög rólegt akkurat núna“ en að stormurinn myndi skella á síðar um daginn. Hún sýndi starfsfólk halda áfram að þjóna gestum, en það vakti reiði margra áhorfenda.

Hún sagðist hafa fengið fyrirmæli um að pakka í neyðartösku og sýndi hvað hún setti í hana: vatn, handspritt og lyf. Ef stormurinn versnaði yrði þeim fylgt í skjól.

Síðar útskýrði hún að þau mættu ekki taka ferðatöskurnar með sér heldur væru heppin með að koma nauðsynjum fyrir í snyrtitösku Chase. Hún sýndi gestaherbergi þar sem skýli höfðu verið sett upp og skrifaði: „Hér verðum við örugglega í einhvern tíma.“

Starfsfólk kom með mat til fólks í skjólinu og vakti það enn frekari gagnrýni á netinu.

„‚Morgunmatur, hádegis og kvöldmatur verður færður til okkar. Sendið bænir‘ – hversu ótengd veruleikanum getur manneskja verið???? Oj,“ skrifaði einn notandi.

„Aumingja þú… á meðan þau þjóna þér geta þau verið að missa fjölskyldu, vini og heimili,“ sagði annar.

Í nýjustu uppfærslu sýndi Alicia hlaðborð með snakki og drykkjum og svo máltíð sem þau fengu á rekkjunum: kúskússalat, humarpasta og jafnvel jarðarberjaostaköku í eftirrétt. Hún endaði myndbandið á að sýna þau með þumalfingurinn á lofti og skrifaði „Södd & örugg“.

Ekki þau einu sem fá skammir

Önnur bandarísk ferðakona, Jourdain sem birtir efni undir @travelwithjourdain, hefur einnig verið gagnrýnd harðlega vegna myndbanda frá Sandals South Coast hótelinu. Hún sagði frá því að gestir hefðu þurft að halda sig inni í herbergjum í tvo til þrjá daga og að mat væri nú pantaður deginum áður.

Jourdain sýndi ríkulegan morgunverð sem hún fékk, pylsur, kartöflur, beikon og egg, auk girnilegra sælgætisrétta. Hún kvartaði þó yfir að salatið sem hún fékk væri án sósu.

Það reitti marga til reiði og Jourdain slökkti á athugasemdum. Hún hefur síðan sagt að hún sé þakklát fyrir þjónustuna og matinn á meðan á hættunni stendur.