Kona var handtekin á Kanarí eftir að hún réðst inn í verslun í Carrizal í Ingenio og hótaði starfsmanni með sveðju áður en hún flúði með aðeins 138 evrur í reiðufé eða rúmlega 20.000 krónur. Rannsakendur lýsa árásinni sem óvenju ofbeldisfullri í ljósi fárra verðmæta sem hún náði með sér, og starfsmanninum var mjög brugðið.

Atvikið átti sér stað um klukkan 11 að morgni 4. nóvember þegar konan gekk inn í verslunina vopnuð stórri sveðju og krafðist þess að starfsmaður tæmdi peningakassann. Hún setti peningana í plastpoka og flúði gangandi af vettvangi. Fjölmiðlar ytra sögðu frá málinu fyrst í gær.

Eftir skoðun á upptökum úr öryggismyndavélum kom í ljós að konan hafði komið í verslunina klukkutíma áður og beðið um peninga án þess að beita ofbeldi, og starfsmaðurinn hafði gefið henni smámynt. Hún sneri síðan aftur, klædd nákvæmlega eins og áður, með hluta andlitsins hulinn hettu, en að þessu sinni vopnuð sveðjunni.

Lögreglumenn þekktu hana sem kunnuglega í hverfinu og gátu fljótt staðfest hver hún var. Með góðu samstarfi Guardia Civil og lögreglunnar í Ingenio tókst að hafa uppi á henni og handtaka hana nokkrum klukkustundum eftir ránið.

Konan var síðar færð fyrir dómara í Telde og rannsókn málsins heldur áfram.