Læknir á sextugsaldri hefur verið úrskurðaður í gæsluvarðhald í Svíþjóð vegna gruns um að hafa lagt á ráðin um tvö manndráp í Stokkhólmi.

Konan var handtekin aðfaranótt mánudags og var úrskurðuð í gæsluvarðhald á miðvikudag. Grunur lögreglu lýtur að undirbúningi tveggja manndrápa sem áttu að eiga sér stað í sænsku höfuðborginni dagana 3. og 4. október.

Ekki liggur fyrir hvort manndrápin hafi í raun verið framin og lögregla hefur ekki greint frá því hver meint fórnarlömb voru. Sænska ríkisútvarpið SVT og Expressen greina frá því að lögregla telji rökstuddan grun leika á að konan hafi gerst sek um brotin.

Konan neitar alfarið sök og mótmælti gæsluvarðhaldi. Dómari féllst engu að síður á kröfu saksóknara vegna hættu á að hún gæti spillt sönnunargögnum eða haft áhrif á rannsóknina.