Samtökin BDS Ísland segja flugvélar tengdar brottvísunaraðgerðum bandarískra yfirvalda hafa tekið eldsneyti hér á landi og gagnrýna íslenska fjölmiðla fyrir áhugaleysi um málið.
BDS Ísland hefur birt myndskeið á samfélagsmiðlum þar sem samtökin halda því fram að fjögur flug tengd brottvísunaraðgerðum bandarísku innflytjenda- og tollgæslunnar, ICE, hafi tekið eldsneyti á Keflavíkurflugvelli á þessu ári, þar af í eitt skipti þar sem Palestínumenn voru fluttir frá Bandaríkjunum til Tel Aviv í Ísrael.
Samkvæmt upplýsingum BDS Íslands áttu flugin sér stað 27. apríl, 29. júlí, 1. ágúst og 10. september. Samtökin segja að flugvélarnar hafi verið reknar af Journey Aviation og tengist flugunum brottvísunum frá Bandaríkjunum.
Sérstaklega er minnst á flugvélina N62FF í myndbandinu, sem samkvæmt BDS Íslandi tók eldsneyti á Keflavíkurflugvelli 10. september.
Einkaþota í eigu viðskiptafélaga Trumps
BDS Ísland bendir á að N62FF sé í eigu bandaríska auðkýfingsins Gil Dezer, sem hefur lengi átt viðskipti við Donald Trump Bandaríkjaforseta.
Flugvélin hefur einnig komið við sögu í umfjöllun The Guardian og +972 Magazine um flug sem tengjast brottvísun Palestínumanna frá Bandaríkjunum.
Samkvæmt þeirri umfjöllun voru Palestínumenn sem bandarísk yfirvöld höfðu handtekið fluttir með flugvél sem tengdist Journey Aviation. BDS Ísland segir að upplýsingar um flugferðirnar sýni að íslenskur flugvöllur hafi verið notaður sem eldsneytisstöð í tengslum við slík verkefni.
Þá birti Amnesty International á Írlandi opið bréf þar sem sviðupum millilendingum þar í landi á vegum ICE er mótmælt.
Samtökin gagnrýna að íslensk stjórnvöld leyfi aðstöðu hér á landi til flugferða sem þau telja tengjast brottvísunum og mögulegum brotum á alþjóðalögum.
Gagnrýna þögn fjölmiðla
BDS Ísland segir að samtökin hafi komið upplýsingum og gögnum um málið á framfæri við fjölmiðla en að hingað til hafi enginn þeirra brugðist við.
Samtökin kalla eftir skýringu á því hvers vegna flugvélar sem tengjast brottvísunaraðgerðum bandarískra yfirvalda geti tekið eldsneyti á Keflavíkurflugvelli.
Samtökin vilja jafnframt að íslensk stjórnvöld rannsaki flugin og kanni hvort notkun Keflavíkurflugvallar í þessum tilgangi samræmist íslenskum lögum og alþjóðlegum skuldbindingum Íslands.
BDS Ísland segja að gögn um flugin sýna skýrt að flugvélar tengdar ICE hafi komið við á Keflavíkurflugvelli og tekið þar eldsneyti. Samtökin telja að íslensk stjórnvöld verði að bregðast við og tryggja að íslensk flugvallaraðstaða sé ekki nýtt í aðgerðum sem kunna að brjóta gegn alþjóðalögum.
Mannlíf hefur sent fyrirspurnir á bæði utanríkisráðuneytið og Isavia, um fullyrðingar BDS Íslands í téðu myndbandi og bíður svara.
Hér má sjá myndbandið sem BDS Ísland birti á dögunum.
