Sr. María Guðrún Ljungberg hefur verið skipuð sóknarprestur í Hofsprestakalli á Vopnafirði og tekur hún til starfa 1. ágúst næstkomandi. Þetta kemur fram í umfjöllun Austurfréttar.

María Guðrún er fædd árið 1985 og lauk BA-prófi í guðfræði frá Háskóla Íslands árið 2009. Hún hlaut meistaragráðu í faginu árið 2011, með áherslu á sálgæslu. Meistararitgerð hennar bar titilinn „Ég og Guð, O boy!“, og fjallaði um þróun guðsmyndar og trúarvitundar meðal kvenkyns guðfræðinema.

Hún var vígð til prests árið 2013 og hóf störf í Patreksfjarðarprestakalli, sem þjónar Patreksfirði, Tálknafirði og Bíldudal. Að þeim tíma loknum hélt hún til Svíþjóðar í framhaldsnám og tók þar síðar prestsvígslu til starfa innan sænsku kirkjunnar.

María Guðrún hefur starfað sem prestur í Svíþjóð í yfir áratug og býr að víðtækri starfsreynslu úr safnaðarstarfi bæði þar og hér á landi. Sérhæfing hennar hefur verið á sviði sálgæslu, andlegrar leiðslu og þjónustu við börn og unglinga.

Í tilkynningu frá Þjóðkirkjunni kemur fram að hún komi til starfa með öfluga þekkingu og reynslu í farteskinu.

Laus staða er enn í Austfjarðaprestakalli og hefur hún staðið ómönnuð í tæpt ár. Gert er ráð fyrir að staðan verði auglýst að nýju síðar á vormánuðum.