Kristrún Frostadóttir forsætisráðherra mun ekki fara að fordæmi forvera sinna, Bjarna Benediktssonar og Katrínar Jakobsdóttur, og grípa inn í launahækkun æðstu ráðamanna.
Laun ráðherra, þingmanna, forseta Íslands og æðstu embættismanna munu hækka um 5,6% næstu mánaðarmót. Það er mun hærra en kjarasamningsbundnar hækkanir á almennum vinnumarkaði, sem í grunninn eru 3,5%, en þó lægra en þróun launavísitölu, sem hækkað hefur um 8,2% á einu ári.
Í krónutölu talið er hækkunin mun meiri en hjá meðallaunafólki. Með launahækkuninni hækka laun forsætisráðherra 154 þúsund krónur, laun ráðherra um 139 þúsund krónur og forseta Íslands um 250 þúsund krónur.
Hækkunin fylgir útreikningi Hagstofunnar á vísitölu launa ríkisstarfsmanna og kemur inn sjálfvirkt. Síðustu tveir forsætisráðherrar hafa hins vegar gripið inn í hækkunina til að „sýna gott fordæmi“ og vinna gegn aukinni verðbólgu.
Bjarni Benediktsson lagði fram frumvarp síðasta sumar til að setja þak á launahækkanir æðstu ráðamanna, þannig að þær færu ekki yfir 66 þúsund krónur á mánuði.
Rökstuðningur Bjarna í frumvarpinu um inngripið í júní í fyrra var að ráðamenn ættu að sýna gott fordæmi í baráttu gegn verðbólgu: „Þannig verði tryggt að hækkun launa þessara aðila skapi ekki aukinn verðbólguþrýsting. Er þá horft til þess að aðstæður eru þannig að afar brýnt er að þeir sem njóta bestu launakjara hjá ríkinu gangi á undan með góðu fordæmi og axli ábyrgð á að stöðva verðbólguþróun sem gæti orðið mjög skaðleg fyrir samfélagið allt.“
Með ákvörðuninni í fyrra var áætlað að ríkissjóður myndi spara 238 milljónir króna.
Katrín Jakobsdóttir lagði líka fram frumvarp árið áður þar sem launahækkanir voru takmarkaðar við 2,5%.
„Ég skynja þessa gremju og ég hef orðið vitni af þessari umræðu síðan ég steig inn á þing. Ég held að það liggi beinast við að það þurfi að endurskoða þetta fyrirkomulag,“ segir Kristrún Frostadóttir í samtali við Vísi. Þar segir hún að sér hugnist ekki að „handstýra þessum launahækkunum“.
Mannlíf sendi fyrirspurn á aðstoðarmenn forsætisráðherra og félagsmálaráðherra á þriðjudag. Ekki hefur borist svar frá ráðherrunum.
