Christian Brueckner, sá sem er helst grunaður í hvarfi Madeleine McCann, hefur skrifað óhugnanlegt bréf úr fangelsi þar sem hann heldur því fram að yfirvöld muni aldrei finna sannanir gegn honum.

Brueckner, dæmdur barnaníðingur frá Þýskalandi sem nú afplánar dóm fyrir nauðgun á eldri konu, gerði lítið úr rannsókn lögreglu í bréfinu og benti á að lík lítils stúlkubarns hafi aldrei fundist. Í bréfinu skrifar hann: „Er lík? Nei, nei nei.“

Þessi óhugnanlegu orð koma fram skömmu eftir að þýska lögreglan hætti við nýja leit í nágrenni Praia da Luz í Portúgal, þar sem Madeleine, þá þriggja ára, hvarf fyrir 18 árum. Brueckner, sem var dæmdur fyrir kynferðisbrot, bjó sjálfur á svæðinu á þeim tíma sem hún hvarf.

Þýsk og portúgölsk lögregla sameinuðu krafta sína í vikunni og leituðu á lóðum og fasteignum tengdum Brueckner, þar sem fangelsisvist hans á að ljúka í september. Rannsóknaraðilar eru sannfærðir um að hann beri ábyrgð á hvarfi Madeleine og keppast við að finna sönnunargögn áður en hann verður látinn laus, en hann hefur neitað allri sök.

Í bréfinu, sem The Sun hefur undir höndum, fullyrðir Brueckner, 48 ára, að engar sannanir séu til gegn honum. Hann spyr hvort DNA hans hafi fundist á vettvangi, eða hvort nokkur ummerki eftir Madeleine hafi fundist í farartækjum hans.

Hann skrifaði:

„Eru einhver önnur ummerki/DNA hennar í mínu fórum? Ljósmyndir? Og ekki má gleyma, er lík? Nei, nei nei.“

Hann hélt áfram og sagði að ákærurnar gegn sér myndu ekki standast og að málið yrði að lokum látið niður falla.

Í bréfinu heldur Brueckner því einnig fram að málið byggist á „keyptum vitnum“, en hann segir sig þekkja þýska réttarkerfið vel og heldur því fram að það sé ólíklegt að hann verði dæmdur í tengslum við hvarf Madeleine.

„Nú er leið mín vörðuð rangfærslum, svo að segja,“ skrifaði hann, „en héðan í frá fylgist allur heimurinn með. Ekki einu sinni héraðsdómurinn í Braunschweig þorir nú að gera augljósa rangfærslu.“

Þessi bréfleki kom aðeins degi eftir að nýjasta leitin í málinu var stöðvuð, eftir að rannsóknarteymi virtist ekki hafa fundið nein haldbær sönnunargögn. Leitin hófst þriðjudaginn 3. júní og fól í sér ítarlega yfirferð á meira en 20 lóðum austan við Praia da Luz, þar á meðal var sumarleyfisstaður sem Brueckner hafði dvalið í um tíma þegar Madeleine hvarf.

Brueckner er talinn hafa búið í bíl eða tjaldað á meðan hann dvaldi í suðurhluta Portúgals.

Leitarteymi fundu bein úr dýrum og fatnað fullorðinna á þessum stöðum, samkvæmt fréttum í portúgölsku sjónvarpi. Lögregla hefur hins vegar ekki gefið út neina opinbera yfirlýsingu um hvað hafi raunverulega fundist.

Jarðýtur og sérhæfður ratsjárbúnaður voru notuð við leitina, sem stóð yfir í þrjá daga, en ekki hefur verið gefið út hvort eitthvað af fundunum verði sent til Þýskalands til frekari greiningar.