Skemmtistaða- og áfengisverslunareigandinn Sverrir Einar Eiríksson hefur verið dæmdur í tveggja ára fangelsi fyrir meiriháttar skattalagabrot í rekstri fjögurra einkahlutafélaga.
Sverrir Einar var ákærður fyrir að hafa ekki staðið skil á tæplega 60 milljónum króna í opinber gjöld. Brot hans tengdust meðal annars B Reykjavík ehf., sem hélt utan um rekstur skemmtistaðar í Bankastræti.
Héraðsdómur Reykjavíkur sakfelldi Sverri Einar á föstudag og dæmdi hann í 24 mánaða fangelsi. Þar af eru 21 mánuður skilorðsbundinn til þriggja ára og þarf hann því að afplána þrjá mánuði. Þá var honum gert að greiða tæplega 105 milljónir króna í sekt.
Dómurinn hafnaði kröfu héraðssaksóknara um þriggja ára bann við þátttöku Sverris Einars í stjórnun félaga.
Sverrir Einar hefur áður verið dæmdur fyrir skattalagabrot. Árið 2022 hlaut hann tíu mánaða skilorðsbundinn fangelsisdóm vegna sambærilegra brota tengdum rekstri þriggja félaga.
