Handboltakappinn Benedikt Gunnar Óskarsson sneri aftur á handboltavöllinn á föstudag eftir langa fjarveru vegna slyss sem hann varð fyrir í sumar. Benedikt kom við sögu í tapi TTH Holstebro gegn Ribe Esbjerg í dönsku úrvalsdeildinni en Vísir greindi frá.

Benedikt gekk til liðs við Holstebro frá norska meistaraliðinu Kolstad fyrir tímabilið en undirbúningur hans fyrir nýja tímabilið tók óvænta stefnu í sumarfríi hér á landi.

Hann var þá í golfi þegar hann fékk golfkúlu í höfuðið. Við höggið missti Benedikt samstundis mátt í hægri hendi og þurfti að dvelja á sjúkrahúsi í fjóra daga.

Síðan hefur hann unnið markvisst að endurhæfingu með það að markmiði að snúa aftur á handboltavöllinn.

Á Instagram birti hann mynd frá slysdeginum þar sem sjúkralið sést hlúa að honum á golfvellinum og þakkaði fyrir stuðninginn sem hann hefur fengið undanfarna mánuði.