Oddný Eir Ævarsdóttir rithöfundur og dagskrárgerðarkona hefur verið ráðin forstöðumaður Gunnarsstofnunar á Skriðuklaustri í Fljótsdalshreppi. Starfið var auglýst í apríl og bárust alls sex umsóknir. Stjórn stofnunarinnar tók ákvörðun um ráðningu Oddnýjar að undangengnu umsóknarferli.

Oddný Eir er fædd árið 1972 í Reykjavík og hefur lokið námi í heimspeki og bókmenntum. Hún hefur áralanga reynslu sem rithöfundur og hefur sent frá sér yfir tuttugu verk. Auk rithöfundaferilsins hefur hún komið víða við í menningarlífinu og unnið m.a. við safnastarf, kennslu, ritstjórn, sýningastjórn og dagskrárgerð.

Oddný Eir hefur einnig setið í stjórn Rithöfundasambands Íslands og átti sæti í stjórn Gunnarsstofnunar um tíma sem fulltrúi sambandsins.

Hún tekur formlega við starfinu 1. janúar 2026 af Skúla Birni Gunnarssyni, sem hefur gegnt stöðunni frá haustinu 1999.

Gunnarsstofnun er menningar- og minningarsafn tileinkað rithöfundinum Gunnari Gunnarssyni og hefur aðsetur á heimili hans, Skriðuklaustri í Fljótsdal.