Lögregla hafði í nógu að snúast í dag vegna fjölbreyttra verkefna víðs vegar um höfuðborgarsvæðið.

Ökumaður var sektaður fyrir umferðarlagabrot, þar á meðal fyrir að nota farsíma við akstur og vera ekki með skráningarmerki á bifreið sinni. Þá var annar ökumaður handtekinn grunaður um ölvun við akstur. Sá var látinn laus að lokinni blóðsýnatöku.

Tilkynnt var um ökumann sem ók nærri því á börn við grunnskóla í Laugardalnum. Enginn slasaðist en málið var rætt við viðkomandi ökumann.

Í Hafnarfirði var tilkynnt um þjófnað og var málið afgreitt á vettvangi með skýrslutöku. Þá var tilkynnt um annað innbrot í Hafnarfirði og er það mál í rannsókn.

Lögreglu barst einnig tilkynning um mann í annarlegu ástandi í Breiðholti en þegar að var komið reyndist viðkomandi vera í lagi.

Að auki voru skráningarmerki fjarlægð af ökutækjum sem reyndust ótryggð.