Brotist var inn á fjögur vinnusvæði á Akureyri fyrr í júní og miklu magni af alls konar verkfærum stolið en lögreglan á Norðurlandi eystra greinir frá þessu í tilkynningu.

„Þetta er auðvitað algjörlega óþolandi því burtséð frá verðmætinu á viðkomandi verkfærum setur þetta starfsemina á vinnustöðunum að einhverju leyti úr skorðum. Tjón framkvæmdaaðila er því mikið,“ segir lögreglan um málið.

„Við viljum í þessu samhengi beina því til allra sem starfa á byggingarsvæðum, viðhaldssvæðum eða öðrum sambærilegum vinnustöðum að huga sérstaklega að öruggri vörslu eigna sinna. Mikilvægt er að verkfæri og önnur verðmæti séu tryggilega geymd utan vinnutíma og að gripið sé til viðeigandi öryggisráðstafana, t.d. með myndavélaeftirliti. Með þessu getum við dregið úr eignatjóni og aukið öryggi á vinnusvæðum.“

Þessi mál eru í rannsókn að sögn lögreglu en þeim hefur ekki ennþá tekist að finna glæpamennina sem standa fyrir þessu.