Salmonella greindist í sýnum sem tekin voru í síðustu viku á búinu Fellshlíð í Eyjafirði. Ástæða sýnatökunnar var að einstaklingur sem tengist búinu hafði greinst með salmonellusýkingu og á búinu voru gripir með sjúkdómseinkenni, m.a. blóðuga skitu en greint er frá þessu í tilkynningu frá MAST.

„Matvælastofnun hefur gefið fyrirmæli um ráðstafanir til að hindra smitdreifingu frá búinu. Þær fela m.a. í sér að bannað er að flytja lifandi dýr út af búinu án leyfis héraðsdýralæknis, þjónustuaðilar skulu klæðast einnota hlífðarfatnaði eða fatnaði búsins, fóðurbíll og mjólkurbíll skulu fara á búið í lok dags, gripir skulu aðeins sendir til slátrunar að undangenginni sýnatöku og neikvæðri niðurstöðu rannsóknar, búfjáráburð má aðeins nota að uppfylltum ákveðnum skilyrðum og hræjum skal fargað með öruggum hætti,“ segir í tilkynningunni.

MAST tekur fram að engin hætta stafar af neyslu mjólkur frá búinu eftir gerilsneyðingu.

Að svo stöddu er ekki vitað hvernig smitið hefur borist inn á búið en Matvælastofnun vinnur að öflun upplýsinga. Jafnframt undirbýr MAST nánari sýnatökur og rannsóknir til að kortleggja umfang smitsins og mögulegar smitleiðir.