Kristinn Hrafnsson, ritstjóri WikiLeaks, gagnrýnir harðlega árásir Ísraels og Bandaríkijanna á Íran og varar við alvarlegum afleiðingum þeirra í tveimur Facebook-færslum sem hann birti í kjölfar aðgerðanna. Þar segir hann Ísrael hafa hafið stríð gegn Íran með virkum stuðningi Bandaríkjahers, að hans mati án lögboðins samþykkis bandaríska þingsins.

„Þá hefur Ísrael hafið stríð gegn Íran og nýtur aðstoðar dyggra þjóna í Bandaríkjaher sem er att fram af forseta landsins án þess að hann hirði um að sækja lögboðið samþykki eigin þings,“ skrifar Kristinn. Hann segir jafnframt „svakalegt að frekar lítið ríki geti beitt fyrir sig slíkum hernaðarmætti til að þjóna eigin ofbeldishagsmunum“.

Kristinn vísar til leiðara í The New York Times, þar sem spurt sé: „hvers vegna hefur þú byrjað þetta stríð, herra forseti?“ Að hans mati sé um eðlilega spurningu að ræða í ljósi þess að engar skýrar útskýringar hafi verið gefnar á því hvernig stríðið eigi að þjóna hagsmunum Bandaríkjamanna. „Svarið er vitaskuld augljóst,“ bætir hann við og segir þá sem vonist eftir betri framtíð fyrir Írana og heiminn eftir átökin geta „deyft þá von með því að líta til annara stríða sömu árásarafla á þessari öld“.

Í færslunni beinir Kristinn einnig sjónum að íslenskum stjórnvöldum og spyr: „Mun ríkisstjórn Kristrúnar Frostadóttur fordæma þetta stríð?“

Í seinni færslu sinni fjallar hann nánar um yfirlýstan tilgang árásanna og vísar þar til Donald Trump. „Trump er skýr í að viðurkenna að tilgangur stríðsins sé valdaskipti,“ skrifar Kristinn og bendir á að slíkt hafi aldrei áður tekist með loftárásum einum saman. Hann útilokar þó ekki að það gæti gerst í fyrsta sinn, en varar við alvarlegum afleiðingum ef það mistekst.

„Ef það tekst ekki með gengdarlausu sprengjuregni næstu daga og vikur hefur Trump valkostinn að viðurkenna árangursleysi aðgerða, sum sé ósigur, eða senda landher inn í Íran,“ segir Kristinn. Hann telur mikla hættu á að heimurinn standi frammi fyrir „miklum skelfingum, mannfalli og flóttamannastraumi“ og bætir við að fyrri reynsla bendi eindregið til þess að sú verði raunin.

Að lokum lýsir Kristinn von um að svartsýnar spár hans rætist ekki, en segir jafnframt: „Ég vona að ég hafi rangt fyrir mér en það eru engar hömlur á eyðingarmætti mesta herveldis heims og skuggastjórnendum þess í Ísrael.“