Sr. María Guðrún Ljungberg hefur verið ráðin sóknarprestur í Hofsprestakalli í Austurlandsprófastsdæmi en greint er frá því í tilkynningu frá Þjóðkirkjunni.

María Guðrún er fædd þann 23. janúar árið 1985. Hún sótti nám í að leiða kristilegt 12 spora starf í Kontempel í Stokkhólmi árin 2022-2024; tók próf í kirkjukennslufræði í Gautaborgar stifti árin 2023-2024.

Hún endurnýjaði vígsluheiti sitt við Dómkirkjuna í Lundi í Svíþjóð árið 2015, en hún hafði vígst til prests í Dómkirkjunni í Reykjavík árið 2013.

María Guðrún lauk meistaraverkefni í trúarlífssálarfræði við Uppsala háskóla árið 2013; verkefni hennar fjallaði um samband trúar og heilsu, með áherslu á merkingarsköpun og túlkunarferli aldraðra í endurhæfingu.

Meistaraverkefni hennar í guðfræði var í sálgæslufræðum við Háskóla Íslands, sem hún lauk árið 2011. Verkefnið var rannsókn á þróun guðsmyndar kvenkyns guðfræðinema við Háskóla Íslands.