Shirley Manson, söngkona skosku rokkhljómsveitarinnar Garbage skrifaði færslu á Instagram-síðu hljómsveitarinnar þar sem hún kallar þjóðarmorð Ísraela á Palestínumönnum „viðbjóðslegasta glæp aldarinnar„. Færslan birtist í kjölfar frétta af því að yfirvöld í Ísrael hafa nú tekið af sér grímuna og hafa nú viðurkennt innlimunaráætlun sína á Gaza-ströndinni.

„Það sem er að gerast gagnvart Palestínumönnum er viðbjóðslegasti glæpur aldarinnar. Það er svo skammarlegt og rasískt, hjartasundrandi og brenglað að stundum á ég erfitt með að trúa að þetta sé raunverulegt.

En hér erum við. Þetta er mjög raunverulegt og fjöldi látinna Palestínumanna heldur áfram að hækka – og enginn virðist reiðubúinn að stöðva slátrunina.“ Þannig hefst færsla Shirley, sem er mikill stuðningsmaður Palestínu, líkt og aðrir meðlimir Garbage. Segir hún einnig að alþjóðasamfélagið láti sem Palestínumenn séu ekki til, enda hafi þeir ekkert vægi.

„Palestínumenn hafa á þægilegan máta „horfið sjónum“ alþjóðasamfélagsins vegna þess að þeir hafa hvorki pólitískt vægi né efnahagslegt afl. Aðeins landið þeirra er einhvers virði – og ríkisstjórn Ísraels ætlar að taka það af þeim með fullkomnu refsileysi.“

Þá skýtur Shirley föstum skotum á vestræna miðla sem hafa margir hverjir gagnrýnt írsku rapp-hljómsveitina Kneecap, fyrir að gagnrýna Ísrael harkalega þegar hún kom fram á Coachella-tónlistarhátíðinni í Bandaríkjunum fyrir stuttu.

„Ég er orðlaus yfir því að vestrænir blaðamenn dirfast að reyna að „slaufa“ @kneecap32 fyrir að tjá viðbjóð sinn yfir morðunum á MEIRA EN ÁTJÁN ÞÚSUND börnum – ÁTJÁN ÞÚSUND BÖRNUM – og við eigum einhvern veginn að trúa því að skrímslin séu þrír ungi Írar í hljómsveit?“

Að lokum spyr Shirley hvort fólk ætli í alvöru að standa hjá og horfa upp á eyðingu palestínsku þjóðarinnar. Kallar hún þetta „geðveiki“ og að heimurinn sé „orðinn brjálaður.“

„Ætlum við virkilega öll að standa hjá og horfa á hvern einasta Palestínumann annaðhvort springa í loft upp eða svelta til bana? Hvernig getur nokkur með viti talið þetta ásættanlegt?

Þetta er GEÐVEIKI.
Þetta er fokking klikkað og heimurinn er orðinn gjörsamlega brjálaður.
Megum við öll skammast okkar!

Frjáls Palestína.
💔“