Bandaríski leikarinn og grínistinn Pauly Shore, þekktur úr kvikmyndum á borð við Encino Man og Bio-Dome, hefur opinberað að hann hafi gengist undir aðgerð til að fjarlægja æxli úr brisi. Hann greinir frá þessu í færslu á Facebook þar sem hann leggur ríka áherslu á mikilvægi forvarnarskanna.
Shore segir að hann hafi fyrir um þremur mánuðum farið í heilsufarsskönnun í Las Vegas, sem skanni allan líkamann frá toppi til táar. Í kjölfarið hafi læknar greint æxli í brisi hans. Þrátt fyrir að æxlið hafi reynst góðkynja hafi hann lýst því sem miklu áfalli að komast að því að hann bæri slíkt inni í sér.
„Þú veist aldrei, gæti það vaxið? Sprungið? Breyst í eitthvað verra? Þú veist það bara ekki,“ skrifaði hann.
Að sögn Shore fékk hann ráðleggingar frá sérfræðingum á Cedars-Sinai sjúkrahúsinu í Los Angeles, þar sem hann gekkst undir aðgerð 21. ágúst. Þar tókst að fjarlægja æxlið með svokallaðri enucleation-aðferð sem verndar brisið, án þess að grípa þyrfti til umfangsmeiri aðgerðar sem nefnd er Whipple.
Hann dvaldi eina nótt á sjúkrahúsi en jafnar sig nú heima. „Ég er allur í lagi og að jafna mig dag frá degi,“ segir hann í færslunni og bætir við að hann hafi nýlokið við fyrstu fasta máltíð sína eftir aðgerðina.
Shore tekur fram að hann hafi alltaf lagt mikla áherslu á heilsu sína, en aldrei áður farið í heildarskanna. Hann telur að sú ákvörðun hafi hugsanlega bjargað lífi sínu.
„Ef ég hefði ekki fylgt innsæinu mínu og farið í skannann hefði ég kannski aldrei komist að þessu, og eftir 5–10 ár gæti verið orðið of seint,“ skrifaði hann og hvetur fólk eindregið til að fara í forvarnarskoðanir.
Í myndbandi sem fylgdi færslu leikarans brestur hann í grát og viðurkennir að þetta hafi verið honum erfitt.
